June 11-19, 2022 chhungin hmun 72-ah chhiatna a thleng

Tun hnaia Mizorama Nikìr Ruah nasa tak a sûr avangin hmun tam takah leimin leh tuilian a thleng a, chhiatna thleng a awm nual. Disaster Management & Rehabilitation (DMR) department chhinchhiah danin, June 11-19, 2022 chhung khan Mizoram hmun 72-ah chhiatna a thleng a, chenna in 23 a chhia.

DMR department hotute chuan Vanglaini palai zawhna chhángin, tun hnaia ruahsûr nasa avangin hmun tam takah chhiatna a thleng a, district ṭhenkhat aṭanga report an la dawn kim loh avangin chhiatna thleng zawng zawng hi an la hriat kim theih rih loh thu an sawi a; chhiatna thlenna district-a bawrhsap ṭheuhte'n silpauline an pek nual bakah, a ṭul angin an buaipui mek tih an sawi a ni.

DMR report-a a lan danin, June 11-19, 2022 chhung khan Mizoram hmun 72-ah leimin, tuilian, lung tla leh lungrem chim avangin chenna in 23 a chhia a, chu'ng zinga in 19-a chengte chu hmun himah sawn chhuah an ni. Bike leh car pakhat ve ve leh scooty pahnih chhia a awm a; police outpost, sikul leh kohhran choka chhia pakhat ṭheuh a awm bawk.

Ruahsur avanga chhiatna thleng 72-te chu Aizawl, Champhai, Kolasib, Serchhip, Lawngtlai, Mamit leh Khawzawl district-a thleng a ni a; hmun 60-ah leimin (landslide), khaw pahnihah tuilian, hmun 10-ah lungrem chhia, hmun pathumah lung tla vanga chhiatna, hmun 45-ah leimin vanga kawng ping a awm a ni.