MPYCC-in July 20, 2022 ral hmaa Damlo bill bá pe turin CM an phût ; CM pisa kawtah police nen an innawr

Mizoram Pradesh Youth Congress Committee (MPYCC) bultumin nimin khan Congress party mi eng emaw zat chu Mizoram State Health Care Scheme (MSHCS) hnuaia bill bate July 20, 2022 hma ngeia pek phûtin Chief Minister pisa gate bulah an pungkhawm. A huhoin CM hnenah an thil phûtte thehluh tum mah se, police-te'n an dang a, police-te nen an innawr.

Chief Minister hnena an kal hmain MPYCC president Dr Lalmalsawma Nghaka chuan, mipui thlavâng hauh tura kal khawm an nih thu sawiin, "Party kan sawi lo. Hemi maiah hian kan duh tâwk dawn lo a, mipui rûmna a tam a, hma kan la zel dawn. July 20, 2022 hmaa MSHCS bill bá pek a nih loh chuan a pawi khawp ang. Mipuiin a premium an pek reng lai leh an tihto deuh deuh laiin, eng vangin nge bill batsak reng an nih?" a ti.

Dr Lalmalsawma chuan, Chief Minister chu nihna zahawm tak a nih thu sawiin, "Hetih lai hian kan CM hian dâwt a sawi pawhin mipuiin ngaiah an nei deuh tawh. Thu dik tâwk lo a sawiin nuihzat lamahte an nei deuh tawh a ni. CM office zahawmna atan pawh hengte hi a sim a ṭul khawpin kan hria," a ti a, mipui hnenah thu dik sawi mai ṭhin turin CM Zoramthanga an phût tih a sawi.

MPYCC President chuan, MSHCS chu MNF sorkarin kum 2008-a bul an ṭan a nih thu sawiin, "An kal hlei thei lo a ni. Congress sorkar hnuah theihtawp chhuah a ni a, health care scheme ṭha tak kan neih phah," a ti.

Congress party mite chu an thil phûtte thehluh tumin Chief Minister hnena kal an tum a, mahse, CMO gate bulah police-te'n an lo dang. Minute 10 vel an innawr hnuah CM pisaa thawktute remtihnain an MPYCC hruaitu ṭhenkhat chu CM pisa tualah an kal a ni.

Chief Minister secretary K Lalthawmmawia chuan MPYCC hruaitute hnenah hian CM-in programme a neih khah vek thu leh ni danga hmuh leh tum mai turin a ngen a ni. MPYCC hruaitute chuan, a tirah chuan CM hnenah ngei lehkha an thehluh duh thu sawi mah se, an inràwn khawm hnuah an lehkha chu CM Secretary hnenah an thehlut a, CM hmalakna an ngaihchàn reng dawn thu an hrilh.

Congress ṭhalaite chuan, CM hnena an lehkha thehluhah hian MSHCS hnuaia damlo bill bá cheng vbc. 71.21 a awm thu tarlangin, "Ṭhenkhat phei chu kum khat dawn batsak an ni a, an mangangin an beidawng tawh tak zet. A tithei zualte'n bill hi awlsam têin an la mai ṭhina sawi a ni. Bill la thei lo mi harsa beidawng mangang au thâwm ngaihthlak hi hrehawm kan ti a, ngawihbopui mai chi niin kan hre lo," an ti.

MSHCS sum cheng vaibelchhe tél bank hrang hrangah a pung tam tak awma dah a nih thu tarlangin MPYCC chuan, "Mipuiin health care atana kan inziah luhnaa kan chawite nen phei chuan health care sum báwmpuiah hian sum tam tak a awm tih hi mipui hian kan hai lo," an ti a; health care bill bá chu July 20, 2022 hma ngeia pe chhuak vek turin an phût a ni.

MPYCC chuan, Chief Minister-in Assembly House-ah, 'SEDP-ah khan khaw nge in pek in tih chuan, a damlo apiangin damdawi-ina an rawn hman theih turin in khat tan chêng nuai hnih thleng SEDP-ah tunah hian kan dah vek,' tia a sawi thu an tarlang a, "Hengte avang hian mipuite'n i sorkarah beiseina sang tak kan nei a ni. Hetih laia bill bat ṭeuh hi a lungawithlak loh tak zet," an ti.

MPYCC chuan, Congress sorkarin ṭha taka health care scheme chhunzawmin, cheng vbc. 122.39 an dah pawh sawi hnâwmsakah CM an puh a; CM-in 'Congress kum 10 sorkarin cheng khat mah health care atan sum an dah lo' tia a sawi chuan an rilru a tihnat thu an tarlang bawk.

MPYCC-in July 20, 2020 hmaa ti tura Chief Minister an phûtte
1) MSHCS sum tling khawm leh a pung zawng zawng zat belh khawm mipui hmaa puanzar.
2) Damlo bill bá zawng zawng pek chhuah.
3) Chhung tina damlo apiang tana Rs 2,00,000 thleng hman theih tura SEDP-a sum dah vek tawh awmna leh sum zat mipui hriat tura puanzar.
4) MNF sorkar hmasa anga health care sum mimal hlâwkpui tura bank-a dah leh dah loh sawi chiang turin.
5) Congress sorkar hmasa sum dah vbc. 122.39 chuang sawi hnâwm a, cheng khat mah dah lo anga dâwt a sawi kher chhan.