Mizoramah damdawi ruihhloa Inchiu ṭhin mi 28,288 an awm

State Working Committee on Ruihhlo Do chu nimin khan an chairman Dr K Beichhua, Excise & Narcotics minister hoin Secretariat Conference Hall-ah an ṭhukhawm. Mizoramah damdawi ruih theiha inchiu ṭhin mi 28,288 an awm nia tarlan a ni.

Meeting-a tarlan danin, National Survey on Extent and Pattern of Substance Use in India (2019), Magnitude of Substance Use in India report-a a lan dan chuan, Mizoramah damdawi ruih theiha inchiu ṭhin (injecting drug user) mi 28,288 an awm a; kum 10-75 inkar mi zingah 7.8%-in zu an in ṭhin a, zu in ṭhin zinga 1.1% chu zu ngawl vei a ni.

Ṭhutkhawmah hian state pum huap Working Committee din bakah, district tinah working committee din an rêl a; district working committee-a chairman atan DC, member atan a kaihhnawih department aiawhte leh tlawmngai pawl hrang hrang aiawhte ruat ni se, an ti.

Khua leh veng tinah village task force din ni se, an ti a; member atan village/local council, kohhran, tlawmngai pawlte leh telh awm mite ruat turin leh chairman leh hruaitu dangte chu member-te'n an thlan turin an rêl a ni.

Task force kaihruaitu tur, an thuneihna leh kalphung, action plan & guidelines duang tur committee ruat a ni a, Excise & Narcotics, Police, Health leh Social Welfare department aiawhte leh Central YMA aiawhte an tel ang.

State Working Committee aṭanga village/local task force thlenga sum mamawh tur duan chhin thlirho a ni a; budget atan cheng nuai 700 pawmin, sorkara la thlen leh tur a ni. Dr K Beichhua chuan, Mizoramah ruihhlo a hluar avangin ṭangruala tihtakzeta do let a ngai tih sawiin, "Vawi leh khatah tihrêm vek theih ni lo mah se, a hluar lutuk tihziaawm hi hna pawimawh hmasa a ni," a ti a; sorkarin a dotu tur Working Committee a din chuan theihtawp chhuahin hmalak an tum tih a sawi.