Thutlukna siam ngam loah sorkar puh

ZPM vice president Dr Kenneth Chawngliana chuan, Mizoram sorkar ding mek chu thutlukna siam ngam lo sorkar a nia sawiin, huaisen taka thutlukna siam ngam sorkar din turin ZPM an inbuatsaih mek tih a sawi.

Nimina ZPM pisaa inkhawmah thu sawiin Kenneth Chawngliana chuan, "Thutlukna mumal siam ngam lo sorkar kan hrawn mek a, mahni inphenna atan páwl hrang hrang ngaihdan an khawn khawm âwl lo maite hi a vanduaithlak hle a ni," a ti. 

Dr Kenneth Chawngliana chuan, "Dan kenkawh lamah kan sorkar hrawn mek hi a hlawhchham chiang hle a, mipui kan ṭhat êm avangin buaina lian zawk kan la pumpelh hrâm hrâm niin a lang," tiin, Mizoram mamawh chu kalphung thar, mipui sorkar a nih thu a sawi a; "Thlei bik nei loa rorelna, dan ngai pawimawha a taka hma la ngam, huaisen taka thutlukna siam ngam sorkar siam turin ZPM chu a inbuatsaih mek a ni," tiin, sorkar ding tawhte'n an hlamchhiah thil ṭha ti turin an inbuatsaih mek thu a sawi.

ZPM Vice President chuan, kum 30 chuang party pahnih chief minister leh party president ni kawpte'n Mizoram an hruai tawh a, hmasawnna awm loin sem policy an kalpui tih sawiin, "Hmasawnna lian tham hmu mumal loin tun sorkar pawh kan thlah liam leh dawn ta. Kan sorkar hrawn tawhah hian party mi hleihluak taka induhsakna a hluar hle a, nawmchenna leh mahni inhâi vûrna sorkar hi langsar taka kan hmuh ṭhin a ni," a ti.

Kenneth Chawngliana chuan, sorkar ding mekah RTI Act hmangin thil dik lo tam tak hmuh a ni chungin, thil dik lo titute hrem an nih thu hriat tur a awm loh thu leh, hna lakah induhsakna uchuak, dan loa contract inpek leh hnathawh ṭha lo a hluar thu a sawi a; ZPM sorkarah chuan nawmchen a rem dawn lo a, lal hrawt tur ni loin, hnathawh kawr haa hna thawk tak tak tur an ni dawn tih sawiin, "Kalphung thar, mipui sorkar hmangin kan ram hi i siam ṭha leh ang u," tiin mipui a sáwm a ni.