Consumer-te'n online hmanga complaint an thehluh theihna tur Rinliana'n a hawng

Food, Civil Supplies & Consumer Affairs (FCSCA) minister K Lalrinliana chuan, nimin khan a pisaah consumer-te'n online hmanga complaint an thehluh theihna tur e-Daakhil web portal, edaakhil.nic.in a hawng.

FCSCA Minister chuan, consumer-te'n thil an lei leh dawnah lungawi lohna an neih chánga awlsam taka an thlen theihna tur web portal hman theiha ruahman a ni chu lawmawm a tih thu a sawi a, "Consumer-te chanvo humhalh nan ṭangkai taka hman theih tura hman nuam taka siam a ni a, smart phone nei tan pawh an mobile phone aṭangin awlsam takin complaint an thehlut thei tawh dawn a ni," a ti.

Web portal hlawhtlinna atan State Bank of India nen thuthlung ziah a nih thu sawiin K Lalrinliana chuan, "He online payment system buaipuina kawngah hian a tìr aṭangin NIC, Mizoram hian min buaipui a ni," a ti a; NIC leh Department of Consumer Affairs, Govt. of India ṭangkawpin scheme an siam CONFONET chuan Mizorama e-Daakhil a puitlin theih nan theihtawp an chhuah avangin a lawm thu a sawi.

Consumer zingah complaint tur neite chuan edaakhil.nic.in ah lutin, in register hnuah complaint thehluh theih a ni a; complaint thehluh chu Consumer Commission lam tan bawhzui zung theih tura duan a ni.

Consumer Commission-a thubuai thehluhte chingfel turin president leh member turte district tinah lak a ni tawh. State Commission-ah president leh member pali an awm a, district commission-ah president leh member pahnih an awm thung.

State Commission hian a din tirh aṭangin case 253 dawng tawhin, case 237 an chingfel tawh a, chinfel hmabak 16 an nei. District Commission-ah chuan district zawng zawng khaikhawmin, din tirh aṭangin case 4,388 dawn a ni tawh a, chu'ng zinga case 4,354 chu chinfel tawh niin, chinfel loh 37 a awm mek a ni.