Health Minister-in Lungleia HFW in sak tharte a hawng

Health & Family Welfare minister Dr R Lalthangliana chuan nimin khan Lungleiah chief medical officer pisa, trauma care facility leh quarters panga a hawng. Minister thil hawnte hi a vaiin cheng nuai 810.45 sênga siam a ni.

Dr R Lalthangliana chuan, Mizoram chhim lam district mipui ma­mawh damdawi lam ruhrel hrang hrang hawn a ni chu hmasawnna rahbi pawi­mawh tak a nih thu a sawi.

Health Minister chuan, Mizoramah health­care infrastructure rua­hman belh zel a ni dawn tih sawiin, "Lunglei Civil Hospital complex-a laboratory building ruahman mek hi nakkumah zawh beisei a ni a, doctor quarters tur paruk pawh zawh thuai a ni ang. JICA kaltlanga cheng vbc. 660 project Mizoram State Cancer Superspeciality Hospital tur pawh DoNER, Ministry of External Affairs, NITI Aayog leh Ministry of HFW-te'n phalna min pe tawh," a ti.

Minister chuan, Streng­thening of Health System in Mizoram pro­ject hnuaiah World Bank kaltlangin cheng vbc. 280 séngin nikum aṭangin hriselna lam tihchangtlun hna thawh a nih thu te, Kawr­pui­chhuah border trade tihmasawn turin Land Ports Authority of India-in DPR cheng vbc. 200 hû an siam tawh chu Ministry of Home Affairs-ah thehluh thuai a nih tur thute a sawi bawk.

Lungleia trauma care facility sak nan Mizoram sorkar sum nuai 300 leh sorkar laipui sum nuai 81 hman niin, Excell Consultancy Services-in an sa a, CMO pisa chu Mizoram sorkar sum nuai 250.8 hmangin ZAMZO Construction and Consultancy Services-in an sa a, type-III quarters panga chu Brilliant Consultancy-in Mizoram sorkar sum nuai 178.65 hmangin an sa a ni.

Hawnna inkhawmah hian Lunglei HPC vice chairman Lawmawma Tochhawng leh MLA Dr K Pachhunga te pawh an tel.