SEDP sem ring lote'n dawn loh an hlau - Robert Romawia

MNF adviser Robert Romawia Royte, minister of state chuan, SEDP sem ring lote'n an hnár an hmu lian mek a, dawn loh hlauah an ṭang ta zawk niin a sawi.

Nimina Mizo Hnam Rûna inkhawmah thusawiin Robert Romawia chuan, SEDP chu party body ni loin, dan ang thlapa sorkarin inkhaidiat fel taka a din committee-te'n an rêl leh a dawngtu tur an thlanna a nih thu a sawi a, "Tunah chuan SEDP sem a nih ring lote'n an hnár an hmu lian mek a, dawn loh hlauah an ṭang ta zawk a, chu chuan party dangte a sâwi ṭhiat mek a ni," a ti.

Robert Romawia Royte chuan, SEDP pilot project atan trade hrang hrangah hmalak mek a ni tih sawiin, "Vawk vulhah phei chuan Rs 3,00,000 dawng kim ṭêp an awm tawh hial a, kan hotute sawi angin a kal zel," a ti a; infrastructure lian atana an hman phei chu sawi tur tam tak a awm thu leh sorkarin sum a pek chhuah chu instalment-a pek zel a nih thu a sawi.

State changkang leh hmasawn zawkte dinchhuahna bul pakhat chu external loan a nia sawiin Robert Romawia chuan, "Tuna ADB sum Central sorkarin min pûksak tur hi thil ropui leh lawmawm a ni a, nasa takin Mizoramin kan ṭhat phah dawn a, kan leiba punna aia kan dehchhuah punna a san phah zawkna tur a ni ang," a ti.

MNF Adviser chuan, social media hman ṭangkai thiam a ṭul thu leh thu dik pho lan nana hman a ṭul thu sawiin, "Social media hmanga thu belhchian dâwl lo vawrh darh chíngte an tlahniam zel a, ZPM-te an tlahniam zel tih hi factual proof a awm. Congress party-ah mipuiin beiseina an nei tawh lo," a ti.

Central-a NDA-ah MNF an tel ve avangin BJP an zawm tihna a ni loa sawiin, "NDA kan zawm zawk a ni. NDA kan zawm hian MNF power a hniam phah lo a, a san phah zawk a, hei hi kan state-in kan hlâwkpui zel ang," a ti bawk.