KHAWTHLIR

DC-in leiminna hmunte a tlawh
Serchhip bawrhsap Nazuk Kumar chuan nimin khan tun hnai ruahsur avanga Serchhip leh a chhehvela leiminna hmun hrang hrangte a tlawh. Serchhip district-a harsatna thlengte zinga a tam zawk chu NH-54 laih zau hna thawh mekin a nghawngte a ni a, Serchhip DC chuan NHIDCL hotute chu a rang lama a theih ang anga thianfai turin a hrilh a ni.

Speaker-in hmanpui
MZP Sub-Hqrs, Sesawng chuan nimin khan an khuaa zirlai ti ṭhate chawimawina hun an buatsaih a, Assembly speaker leh bialtu MLA Lalrinliana Sailo-in a hmanpui. Speaker chuan, zirlaite chu Sesawng khawtlang innghahna tur, Zoram khawvel la ni turte an nih avangin nun fimkhur turin a chah a, "Khawvel hmasawnnain a ken tel social media hman thiam a pawimawh," a ti.

Scouts & Guides
Mizoram Bharat Scouts & Guides Executive Committee chu nimin khan Sports & Youth Services conference hall-ah an ṭhukhawm a; state chief commissioner atan Dr H Lalthlangliana, School Education director leh assistant state commissioner (Scout) atan Lalthanzama, School Education additional director-te lak luh an ni.

Police zawng
PC Lalmalsawma (44) s/o PC Dailova, 1st MAP mi leh sa, Saipum rama Mizoram ramri venga duty chu June 18, 2022 chhun dar 12 vel aṭangin a awmna chin hriat a ni lo a, zawn mek a ni. Thu dawn danin, PC Lalmalsawma hi June 18 tlai dar 3 vela roll call-ah a awm lo a, zanriah ei hunah pawh hmuh a la ni loh avangin an bûk leh a chhehvel an dap a, Pathianni zing aṭangin Saipum khawtlangin an zawng ṭan a, he thu ziah lai thleng hian hmuh a la ni lo.