Champhai leilet huam chhung Special Economic Zone-a puan rél

Land Revenue & Settlement (LRS) minister Lalruatkima leh Environment, Forest and Climate Change minister TJ Lalnuntluanga te hoin nimin khan Agriculture department leh LRS department hotute'n Champhai district-a leilet, wet rice cultivation ram (Champhai leilet) humhalh dan tur an sawiho. Champhai leilet huam chhung chu Special Economic Zone-a puan tura ruahman an rél.

Ṭhutkhawmah hian Champhai leilet zirchianna report zirho a ni a; Champhai leilet huam chhung chu Special Economic Zone (SEZ)-a puan tura ruahman ni se, an ti. LRS department chuan July 2021 khan Champhai leilet chhunga agriculture lam hmalakna ni lo chu hmalakna dang kalpui phal a nih loh thu a paung tawh a; Champhai leilet chu hectare 606.66-a zau niin, leilet huam chhunga pass nei sate chu an pass neih mila siam remsak tum a ni.

Pass siam rem tum a nih chhan an tarlan danin, Champhai leilet huam chhungah in sak leh thil dang atana hmalakna, sorkar phalna ni loa kalpui a tam bakah, lo neia eizawngtute hmakhua ngaih vang a ni a; hmalak a nih loh chuan nakin zelah loneitute tan eizawnna tur hmun hma a awm loh a hlauhthawnawmah ngaih a ni.