Hripui vei enkawl zat an tlahniam hret hret

June 19, Pathianni khan Mizoramah Covid-19 vei mi pahnih chiah hmuh chhuah a ni a, positivity rate 7.41% a ni. Nimin khan hripui vei dam tawh mi 32 chhuahtir an ni a, hripui vanga thi an awm lo. Covid-19 positive enkawl mek zat an tlahniam hret hret.

Pathiannia hripui vei hmuh tharte Rapid Antigen Test hmanga hmuh ve ve niin, New Serchhip North leh Saitual Venglaia mite an ni a; ZMC laboratory, TrueNAT leh FIA hmangin swab sample endik a awm lo. Mi pahnihte chu mipa leh hmeichhia an ni.

Mizoramah a záwnin ni riat chhung hripui vanga thi an awm tawh lo a, June thla bikah mi pathum an thi tawh. Thi an awm hnuhnun ber ṭum chu June 12, 2022 a ni.

IDSP record angin, Mizoramah Covid-19 vei 2,28,733 hmuh chhuah a ni tawh a, mipa 1,06,493 leh hmeichhia 1,22,240 an ni a, mipa aiin hmeichhia 15,747-in an tam zawk. Nimin tlai dar 5 thleng khan mi 2,27,921 (99.65%) chhuahtir an ni tawh a, mi 701 (0.31%) thi tawhin, enkawl mek mi 111 (0.04%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pathum - Siaha, Lawngtlai leh Hnahthial district-te a awm a; positive active case tamna ber Aizawl district-ah mi 55 an awm mek a, Kolasib district-ah mi 27 an awm mek bawk.