Supreme Court-in sorkar thu a hnawl ; Supplier leh sorkarin inremna an siam

Aizawl District & Session Court-a Sr. Civil Judge thutlukna Mizoram sorkarin a khin letna chu Supreme Court-in a pawm lo. Supreme Court-in sorkar khin letna a hnawl avangin Mizoram sorkar chuan cheng nuai 600 chuang supplier hnenah a pek ṭul a, mahse supplier hi Mizoram sorkar chuan inremna a siam pui.

MNF sorkar laia police modernisation hnuaia supplier Lalrinpuii chu bill a lak theih loh avangin Court-ah a zualko a, Aizawl District & Session Court-a sr. civil judge Vanlalchami chuan sorkar chu supplier hnenah hian a bill leh a pung pe turin a ti a, hei hi nuai 600 chuang a ni. Bill hi an pe lo a nih chuan police bungrua leh hmunhmate lak sak tura tih a ni a, an laksak tur zingah hian Aizawl Police Station pawh a tel.

Police hotute chuan Lalrinpuii thil supply hi an dawn ngei thu sawi mah se, Mizoram sorkar chuan pawisa a pe lo a, hei vang hian Court chuan supplier hnena pawisa pek hi Mizoram sorkar mawhphurhnaah a ngai a ni.

Court thutluknaah hian Mizoram sorkar chu a lungawi loh avangin Gauhati High Court, Aizawl Bench-ah a zualko a, High Court chu Sr. Civil Judge thutluknaah hian inrawlhna tur nei loah a inngai a ni. Hemi hnu hian Mizoram sorkar chu Supreme Court-ah a zualko leh a, tun hnai khan thutlukna siam niin, Sr. Civil Judge thutluknaah hian dan dik lo hmuh a nih loh thu tarlan a ni.

Supreme Court-in thutlukna a siam hnu hian supplier Lalrinpuii hi Mizoram sorkar chuan inrem puiin, Court thutlukna ang sorkarin a chawi a ngai dawn lo.

Thudawn danin, Law & Judicial dept. chuan Sr. Civil Judge thutlukna hi a zirchian hnuah appeal na tur an hmu loa, mahse sorkar chuan Gauhati High Court-ah a appel ta tho a ni. Sr. Civil Judge hi a thutlukna avang hian hek a nih avangin suspend a ni. Vanlalchami hi suspend a nih chungchangah leh hamṭhatna a neih ṭhenkhatte chhuhsak a nih avangin Gauhahti High Court-ah a zualko dawn.