Mizorama Hindi dinhmun zir chiangtu turte an rawn thleng
Sorkar laipuiin Centrally sponsored scheme (CSS) hnuaia Mizorama Hindi zirtir dan leh Mizoram dinhmun zir chiang tura tih, Awadh Research Foundation, Lucknow, Uttar Pradesh aiawhte chuan April 5, 2017 khan Aizawl an lo thleng.
Mizoram CSS Hindi Teachers Association (MCHTA) chuan thuchhuah siamin, School Education Deputy Director aṭangin Awadh Research Foundation-te chu thawhpui tura ngenna an hmuh angin, lo ṭawiawm a, dawnsawn an tum thu an tarlang.
MCHTA chuan, an thawh hun a tàwp tawh avangin an post-ah an awm thei tawh lo tih sawiin, "Mizoram sorkarah evaluation an neih chhung min ruai chhunzawm tura kan ngennain awmzia a neih loh avangin zir chiang tura lo kalte'n sikul an tlawh hunah, mahni thawhnaa sum lam harsatna leh rokhawlhna kan neih vanga kan awm thei lo a nih pawha min hrethiam turin sorkar leh mipui kan ngen tak a ni," an ti.
Hetih lai hian MCHTA chuan, sorkar laipui aṭanga evaluation team lo kal tawh leh zir chiang tawh anga Mizoram sorkar aṭanga sawi awm ṭhin chu a dik lo niin an tarlang a, "Evaluation nei tura Central rawn tirhte chuan April 7, 2017 aṭangin zirchianna hna an kalpui mek zawk a ni," an ti a; evaluation team chuan Hindi teacher-te an endik dawn lo a, Hindi thiamna kawnga Mizoram dinhmun leh hmasawnna an zir chiang dawn tih an sawi.