IFAD-in district pali an fang kual

United Nations hnuaia International Fund for Agriculture Development (IFAD) Design Mission Team chu Mizoramah an châm mek a, district hrang hrangah kut hnathawktete kâwm kualin, an hnathawhna hmunte an fang kual mek.

IFAD Design Mission Team Inrinni khan Champhai district-a Hnahlan leh Vaikhawtlanga kut hnathawkte an kâwm a, Hnahlan Winery leh Vaikhawtlanga ran vulhte an tlawh a; thlai an chin dan leh ran an vulh dante an zawtfiah a ni.

IFAD team hotute chuan, Champhai district an tlawh chhan chu, a zau thei ang bera lo neitute dinhmun hre tur leh Mizoram sorkar nen thawk dûn a, awmze nei zawka thlawhhma lak dan tur kawng zawnpui a nih thu an sawi.

Champhai district tlawhtu IFAD team hi Edward Mallorie, Claudio Mainella leh Dr Ajender Negi te an ni a; NLUP Implementing Board aiawhte'n an ṭawiawm a ni. Team member-te hian April 7 khan NLUP line department hrang hrang hotute an kâwm bawk.

IFAD team dang - agronomist & agro forestry Dr.Virendra Pal Singh, FAO economist Barbara Jordan Vincente leh financial management specialist Pratul Dube te chuan Kolasib district an fang thung a; Zanlawn khua, Bukvanneia Oil Palm Mill leh Bairabi khuate an tlawh.

IFAD team member pahnih - country coordinator Meera Mishra leh NRM specialist Dr Venkatesh Tagat te pawhin Serchhip leh Thenzawl an tlawh a; kut hnathawktu te, kut hnathawktu pawl hruaitu te, khawtlang hotute leh NLUP line department hotute an kâwm.

Thenzawlah chuan puantahtute nen an inkawm bakah, an puantahna hmunte an tlawh a; AH&Vety Farm, Fisheries department farm leh PIGFED vawkpui vulhna hmunte an tlawh a ni.

Inrinni khan Chhingchhipa MIFCO-in sapthei an sawngbawlna hmun an tlawh a, Khumtungah kut hnathawktute nen an inkâwm bawk.

IFAD team leader S Shetty, programme analyst Shriram Subramanium leh Bhavit-te awmna team chuan Mamit district an tlawh thung a; April 7 khan Mamit Tourist Lodge-ah Mamit DC leh NLUP line department hotute leh tlawmngai pawl hruaitute an kâwm.

April 8 khan Mamit district chhunga Bawngva, Darlak leh Tuidam khua NLUP ṭanpuina dawngtute an kâwm kual a, NLUP hmanga an hmalaknate a hmunah an ensak a ni.

IFAD Missions Team-ah hian member 11 awmin, Mizoram zir chiang turin April 6, 17 khan Aizawl an rawn thleng a; team pali-ah inṭhenin, Champhai district, Kolasib district, Serchhip district leh Mamit district-te an tlawh kual a ni.

IFAD ṭanpuina in Mizoram sorkar chuan Serchhip, Kolasib, Champhai leh Mamit district-ahte RD Block 11 chhunga chhungkaw 64,000 huam turin Mizoram Integrated Agriculture, Natural Resources Management and Livelihood (MIARMAL) Project, NLUP kalphung zuia kalpui turin ruahmanna a siam.

MIARMAL hmalakna tur hian IFAD mithiamte'n district palite an zir chiannaa an thil hmuh leh zir chhuahte aṭangin hmalak dan tur kimchang an duang ang a, Mizoram sorkar hotute nena inberáwn chungin hmalak dan tur an siam dawn a ni.

IFAD hi kum 1977-ah UN-in ram ṭhang meka retheihna ûmbona kawnga hna thawktu bik atana a din a ni a, an hmunpui chu Italy-ah a awm a ni.