Fapa thattua puh bail hun chhung Court-in a titawp

Thangkhothang Lhung­dim, kum 2016-a Seling Field Venga a fapa that a, a nupui Rosy Lalnunsangi na taka kut thlaka puh chu bail-a a awm reng hnuah, Court-in April 7, 2017 khan bail hun chhung a titawp.

Thu dawn danin, Assam Rifles sipai Thangkhothang hian November 13, 2016 tlai khan Selinga an inah a nupui, Rosy Lalnunsangi leh an fapa naupang zawk Isaac Lalrinawma (5) te chu na takin kut a thlak a; Isaac Lalrinawma chu Thingsul­thliah damdawi-ina hruai a nih hnuah a hliam tuar loin a thi a, a nupui pawh na taka hliamin, nikhaw hre loin hun eng emaw chen Aizawl Civil Hospital-ah enkawl a ni.

Thangkhothang Lhungdim lakah hian Bawngkawn Police Station-ah thubuai ziah luh a ni a, Thangkhothang chu police-in an man. Case Investigation Officer-in ni 90 chhungin Court-ah chargesheet a thehluh hman loh avangin Thangkhothang chu February 23, 2017 khan Court-in bail-in a chhuahtir.

Bail-a a chhuah hnuah Thangkhothang hian a nupui leh a chhungte chu telephone hmanga vau ṭhin nia sawiin, a nupui Rosy Lalnunsangi chhungte chuan Thangkhothang bail-a chhuah a nihna chu titawp turin Court an ngen. Hei bakah hian, bail-a chhuah a nih dawna Aizawl chhuahsan lo tura a intiamna chu bawhchhiain, Manipur lamah a chhoa hriat a ni a, a ukil pawhin a awmna chin a hre lo a ni.

Hengte avang hian Aizawl District Additional and Sessions judge Vanlalenmawia Court chuan Thangkhothang Lhungdim bail-a chhuah a nihna thupek chu a titawp a, police-te chu a rang thei ang bera man turin a hriattir a ni.