Pharmacist leh DIET lecturer lakna Siamṭha turin SSU-in sorkar an phût
Students' Self-Support Union (SSU) chuan thuchhuah siamin, Labour, Employment & Industrial Training (LEIT) department hnuaia DIET lecturer 44 lak tur leh National Health Mission (NHM) hnuaia pharmacist 12 lak tum danah thil dik lo a awm niin an tarlang a; hna lak tum dan chu siamṭha leh thuai turin sorkar an phût.
SSU tarlan danin, LEIT department hnuaia DIET lecturer 44 lak tum chu Employment Exchange kaltlang loa lak tum a ni a, chuvang chuan March 2, 2017-ah show cause notice an pe a ni. Sawifiah tura hriattirna chu chhan a nih loh avangin March 16-ah reminder an pe leh bawk.
Chumi hnuah a buaipuitu Education Secretariat lam chuan Employment Exchange-ah hriattirna an thawn a, mahse, recruitment rules an thawn tel loh avangin Employment Exchange lamin lecturer lakna tur qualification an hre thei lo a, hna zawng lai an neih aṭangin list an thawn thei lo.
DIET lecturer lak tum hi Centrally sponsored scheme hnuaia lak tur a ni a, an hlawh (pay scale) chu pay band-3 Rs. 15600-39100+5400 GP a ni.
NHM hnuaia pharmacist 12 lakna tur hian kumin February thlaah leh March thla tirah advertisement chhuah a ni a, March 15, 2017-ah personal interview neih a ni. Diltu mi 24 zinga mi 22 an inlan a, result tihchhuah a la ni lo.
SSU chuan, he hna lakna kalpui hma hian NHM hnuaiah tho Diploma in Pharmacy zir chhuak hlim pakhat chu an certificate pawh a chhuah hmain dan kalhin pharmacist atan lak a nih thu an tarlang.
SSU chuan, sorkar hna lak reng reng, a nghet emaw, nghet lo emaw pawh ni se, thla thum aia rei thawk turte chu Employment Exchange kaltlanga lak vek tur a ni tih sawiin, "Employment Exchange kaltlang loa lak an ni ta mai leh dan loa thil a kal leh ṭhin hi ṭha lo kan ti hle. He thil hi siamṭha thuai turin Mizoram sorkar kan ngen a, siamṭhat thuai a nih loh chuan a tawp thlengin hma kan la dawn a ni," an ti.