Workers Welfare Board siam tha dawn

Labour Employment & Industrial Training (LEIT) changtu, chief minister Lal Thanhawla hoin nimin khan CMO-ah LEIT hotute an ṭhukhawm a; Mizoram Building & Other Construction Workers' Welfare Board (MBOCWWB) chu siamṭhat an tum.

Chief Minister chuan, LEIT chu depart­ment pawimawh tak, ITI leh skill development hmanga ṭhalaite tana eizawnna kawng siamsak theitu leh kawng kawhhmuhtu a nih thu sawiin, "Department hmalakna leh ruahmannate fimkhur leh uluk taka ngaih­tuaha kalpui a pawimawh," a ti a; department hotute chu ruahmanna reng reng chîk leh uluk taka zir chiang turin a chah.

Meeting-ah hian MBOCWWB chung­changa CAG 2016 Report-a thil fel lo leh dan pêla thil tih tarlante sawiho a ni a, he thilah hian action la turin department a inpuahchah mek tih an tarlang.

A chhawrtu turte'n an ṭangkaipui theih dan ber leh a nih dan tur ang taka Board a kal thei nan, Board chu siam-

ṭhat (restructure & constitute) a ṭul tih a ni a, chumi atana hmalakna turte sawiho a ni.

Meeting-a tarlan danin, NIAS, Kolkata-ah zirlai 32 aṭangin zirlai parukin final exam atan hming an pe a, deparment chuan zirlai parukte'n hlawhtling taka exam an paltlang ngei an duh avangin an enzui reng a ni.

Course fee pêk lâwk tawh refund (pêk lêt) chungchang chu bawhzui mek a ni a, he thila mawhphurtu nia puhte lakah department proceeding kalpui mek (drawn) a ni.

Mizorama ITI-te dinhmun meeting-ah tarlan a ni a, thawktu indaih loh avangin harsatna an tawh mek avangin post ruak ṭhenkhat chu hnawhkhah vat a ṭul an ti a; chumi atana ṭulte bawhzui turin Chief Minister chuan department hotute a hrilh.

Mizoram Youth Commission chu ṭhalai tam takin an ṭangkaipui thu sawi lan niin, ṭhalaite'n an chhawr zel theih nan tuna project kal mekte sawiho a ni a; MYC chu a pawimawh avangin a pangaia hna an thawh leh vat a ṭul an tih thu an sawi.

Meeting-ah hian LEIT secretary Benja­mina, director Lalhmachhuana leh officer eng emaw zat an tel a ni.