PRISM-in 2018 inthlanah chuh an tum

PRISM hruaitute chuan, Mizo­ramin sorkar a neih ṭhin ang ni lo sor­kar danglam din an tum thu an puang a, kum 2018-a Assembly inthlan­puiah chuh ve an tum thu an sawi.

Nimin khan PRISM hruaitute'n Aizawl Press Club-ah thuthar thehdarhtute an kâwm a; 'Kum 2018 inthlanpuiah in chuh dawn tihna a ni em? tih zawhna chu an president Vanlalruata chuan, ''Ni deuh ber mai," tiin a chhang. PRISM hruaitu dang K Tlanthanga chuan Mizoram siamṭhatua an ṭan mai a ngaih thu sawiin, "A ti theitu nih i tum ang u, kan ti a ni," a ti.

Zawhna dang chhangin Vanlal­ruata chuan, political party anga inziah luh tumna an la neih loh thu a sawi a; kum 2018 inthlanah chuan an tlin theih an inrin thu a sawi bawk.

PRISM pawl hmalakna turah politician-te kalphung pangngai anga kal an tum lo tih sawiin Vanlalruata chuan, "Kan sorkar neih ṭhin ang ni lo sorkar danglam din tum kan nih avangin kan kal dan pawh a danglam dawn. Ram leh hnam tana ṭha lo kan ti dawn lo a, sum leh pai kan chelek dawn lo. Tih theih tak tak loh kan tiam dawn lo a, dâwt kan sawi dawn lo. Kalphung pangngai leh siamṭhat tumna indona kan puang a ni ta ber," a ti.

Vanlalruata chuan, PRISM chu mipui ta leh mi zawng zawng huap leh lenna a nia sawiin, "Ram siamṭhat nana din a nih avangin ram leh hnam tan chuan tu pawh kan thawhpui thei," a ti a; ram siam ṭhat tuma an hmalaknaa tel turin mipui a sáwm.

PRISM-in sorkar ṭha leh rorelna dik siam an tum dan chu - ram leh hnam humhalh ngam, ṭhalai leh ṭhang­tharte chhawr tham, sorkar ruhrel leh inawpna siamṭha ngam, dan zâwma dik taka lekkawh ngam, lang­tlang sorkar, eiruk hmang hrem ngam, mipui náwlpui hamṭhatna pe thei, ram hausakna leh hmasawnna ruhrel din sa hmang ṭangkai thiam, hmasawnna ruhrel din thei leh, sumdawnna awmze neia kalpui thei tihte a ni.

Vanlalruata chuan, Mizoramin hma a sawn chak loh chhan bulpui ber chu corruption nia an ngaih thu a sawi a; tute'n emaw mipui leh ram tana sorkar hmalâk tur an tihchingpen ṭhin vang nia sawiin, "Sorkar hmalâkna tichingpen ṭhintute hi kan zavaia tân mipuiin a huhoa do rawn a ṭul a ni," a ti.

PRISM President sawi danin, an pawl hmalakna vangin eiru chhui chhuah hi mi 300 an awm tawh a, chu'ng aṭang chuan mipui sum awmze nei loa kal ral tur cheng vbc. 1,800 aia tam hum a ni-ah an ngai. An President chuan, PRISM hian district tina khaw 345-ah branch an nei tawh niin a sawi.