Governor leh India palai an inkâwm

Indian ambassador to Myanmar Vikram Misri leh Governor Lt.Gen. Nirbhay Sharma te chu Pathianni tlai khan Raj Bhavan-ah an inkâwm a, zanriah an kîl dun nghal.

Governor chuan, India sorkarin Look/Act East Policy chak taka a kalpui mekah India hmarchhak biala state hrang hrangte hmelhriat leh zir chian chu tihmâkmawh a nih thu a sawi a, "Chumi rual chuan, hmar­chhak state-a chengte pawhin sorkar laipuiin he policy kal­tlanga he lai bial tana ruahmanna a neihte an hriata an thlàwp ve a pawimawh a ni," a ti.

Vikram Misri chuan, an nupain hmarchhak bial an fan mek thu sawiin, "Mizoram hian India leh Myanmar inlaichinnaah dinhmun pawimawh tak a luah avangin ka rawn zin thei hi ka lawm hle," a ti. Sorkar laipuiin hmarchhak state-te'n harsatna an tawhte a hmunah ngei hmelhriat a, tihhmasawn a tum thu Larsap a hrilh a ni.

Indian Ambassador to Myanmar hian chief secretary Lal­malsawma pawh nimin khan CS conference hall-ah a kawm a, Mizoram chu India rama ram ralmuang ber leh harstana thlen tlemna ber a nih thu a sawi.

Meeting-ah hian insumdawntawnna tihmasawn turin border haat siam belh tum a nih thu te, Zokhawthar Land Custom Station hman tangkai a nih dante leh Mizoram kaltlanga dan loa thil lakluh/ thawnchhuah awm chungchangte sawiho a ni.

Chief Secretary hi Commerce & Industries dept. leh PWD hotute'n an ṭawimawm a ni.