MBOCWWB-in awareness campaign atan kum 2 chhungin maktaduai 2 chuang an hmang

Mizoram Building and Others Construction Workers Welfare Board (MBOCWWB) chuan, kum 2015 leh 2016 chhung khan NGO-te hnenah awareness neihna atan leh Board member-te'n khaw hrang hranga awareness campaign an neihna atan Rs. 22,71,300 an hmang.

MBOCWWB hotute chuan, kum 2006-a Supreme Court thuchhuak angin, India ram state hrang tana Welfare Board din tura a tihna hnuai­ah awareness neihna atan NGO-te hnenah an hmalakna puanzarna tur sum hman theih a nih thu Vanglaini palai an hrilh.

MBOCWWB-in pawl hrang hranga awareness campaign a neihna atan hriat theih chinah kum 2015 khan Rs. 9,80,000 hman a ni a, kum 2016 chhungin Rs. 12,91,300 hman a ni. Kum hnih chhunga awareness atana senso zawng zawng chu Rs. 22,71,300 a tling.

Awareness campaign atana sum hman zinga nuai 13 chuang chu trade union pathum - NTUM, FOMTU leh CITUM-te hman a ni a; PRISM-in kum 2015-a Berawtlânga Youth Rally (Anti Corruption Campaign) an neih ṭuma awareness campaign atana Rs. 1,50,000 hman pawh a tel.

PRISM-in MBOCWWB sum an hman chung-chang hi tun hnaia Assembly budget session neih zawh takah Congress MLA leh LEIT minister hlui Lalrinliana Sailo-in a sawi chhuak a; chumi chungchangah chuan PRISM-in sawifiahna an siam tawh bawk.

MBOCWWB hotute chuan, kum 2006-a Supreme Court thu­chhuak angin, awareness campaign atan PRISM hnenah pawisa an pe a, Beraw­tlanga PRISM programme-ah pawh Board hotute kalin, welfare scheme chungchang leh hamṭhatna awm chungchangte an sawifiah niin an sawi.

Awareness atana sum hmanah hian, MBOCWWB member NTUM, CITUM, FOMTU-te'n khaw hrang hranga an campaign-na atana senso Rs. 13,20,000 a tel a; kum 2015-ah Rs. 6,00,000 leh kum 2016-ah Rs. 7,20,000 hman a ni. TV leh chanchinbu lamah tlem azawng an hmang bawk.