Duhoma'n thawh ṭhata tlin tum turin a chah
ZNP president Lalduhoma chuan nimin khan an party pisaa inkhawmah thu sawiin, "World class education min tiamtute hian vote leia tlin ringawt tum loin, hnathawh ṭhat vanga tlin tum turin thurâwn kan pe a ni," a ti.
Lalduhoma chuan, sikul luh hun tur hriat lâwk a ni chunga sikul luh tawh hnua zirlaibu lei tur a awm lo fo chu ṭha lo a tih thu sawiin, "A rang thei ang bera zirlaibu kim an neih theih nana ṭan la turin sorkar kan ngen a ni,” a ti a; Mizoramah zirtirtu pakhat chauh awmna primary school 42 a awm niin a sawi.
Hnam dang (non-tribal)-te Mizorama an sumdawn chungchang sawiin Duhoma chuan, tunah hian Mizorama sumdawn theihna nei hnam dang mi 311 an awm niin a sawi a, "Chîmralna lakah kan him lo tual tual a ni," a ti.
VAT Act 2005 Section 83 ang chuan, hnam dangte Mizoramah an sumdawn dawn chuan ILP kum hnih nung an nei tur a ni tih a nih thu sawiin, "Kan Finance Minister berin kan ILP hi awmze nei tawh lo ang hrima a chhuah hi a pawi a, hnam dangte fuihpawrhna statement ṭha lo tak a ni,” a ti.
Lalduhoma chuan, kum 33 chhunga Mizorama sorkarna siamtu Congress leh MNF party chungchang sawiin, "Mizo mipuite’n damdawi pahnih kan ei tawhte hi kan ngeih lo a ni. Kan sorkarte hi sorkar leh se tih tur thar an nei tawh lo. Anni ni lo damdawi thar i ei tawh ang u tih hi tunlai Zoram pum agenda lian ber a ni a ni,” a ti a; ram veitu zawng zawngte chu party-a inziak lut kher lo a, huang khata hma lakpuiah a sáwm a ni.