Horticulture College dinhmun CM hrilh

Central Agricultural Univeristy (CAU), Imphal hotute chuan, nimin khan vice cancellor Dr M Premjit Singh hoin chief minister Lal Thanhawla a pisaah an kâwm a; Thenzawla Horticulture College sakna atana hmalaknate an sawipui.

Chief Minister chuan, Horticulture College chu Mizorama lo neitute bakah, mipuiin an chhawr hle dawn tih sawiin, "College changtlung tak a nih theih nan Mizoram sorkarin theihtawp a chhuah a ni," a ti.

Dr M Premjit chuan hma an lak tawh chin leh an hmachhawpte sawiin, college sak a nih theihna atana ram hectare 120-a zau a thlawna pek an nih avanga an lawm thu Chief Minister a hrilh.

CAU Vice Chancellor sawi danin, Thenzawl ramah hian nakkuma zirna ṭan a nih theih nan pre-fabricated building eng emaw zat sak a ni dawn a, thla ruk chhunga peih beisei a ni. Hemi rual hian, permament building cheng vbc. 88 sênga sak turin NPCC thlan a ni tawh.

Permanent building-te chu kum hnih chhunga sak zawh hman beisei a ni a; hna pahnihte chu a ruala thawh a nih theih nan hmalak mek a ni. Tunah hian Horticulture College-ah hian seat 20 awm­in, academic session kal mekah hian zirna chu Selesih-a Central Agriculture University-ah kalpui mek a ni.