Skywalk leh ropeway thubuaiah ACB chhuina report nghah mek a ni ; Tourism dept-in mimal rinhlelh an nei lo

Sakawrhmuituai tlanga skywalk leh Chaltlang leh Durtlang inkara ropeway siam chungchangah Lokayukta chuan Anti Corruption Bureau (ACB) chhuina report an nghak mek. Hetih lai hian, complaint thehluttu pakhat zawk Tourism department chuan an complaint-ah mimal emaw, company emaw, an rinhlelh zawng an tarlang lo.

Tarlan tawh angin, MNF party-a Vigilance department leh Legal Board-te chuan November 22, 2021 khan skywalk leh ropeway siam turah thil dik lo a awm nia ngaiin Lokayukta-ah complaint an thehlut a ni. Skywalk leh ropeway siam tura nodal department, Tourism department chuan Lokayukta-ah vêk chhui chiang tura ngenna February 3, 2022 khan an thehlut ve bawk.

Lokayukta chuan MNF complaint thehluh chu a chhui chian hnuah ACB-te'n an chhui zui turin thutlukna a siam. ACB chuan December 7, 2021 khan chhui phal dilna Mizoram sorkara Vigilance department-ah an thehlut a; Vigilance-in an zir chian hnuah December 17, 2021 khan chhui phalna tichhuakin, ACB chuan December 22, 2021-ah chhui phalna lehkha an dawng.

Tourism department chuan skywalk leh ropeway chungchang chu chhui chian ṭha an tih thu an Director hmingin February 3, 2022 khan Lokayukta-ah an thlen a; Lokayukta chuan chhui chian ṭul an tih chhan te, contract agreement te, contract amount te, rinhlelh an neih leh neih lohte leh thil dang dang Tourism department-ah an zâwt lêt a ni.

Tourism department chuan Lokayukta zawhna hrang hrangte chu an chháng a; rinhlelh an neih leh neih loh zawhnaah erawh chuan, rinhlelh mimal/company tarlan an nei lo.

Lokayukta chuan Tourism department chhannate a zirchian hnuah ACB chhui chian turin a thawn a; ACB chuan MNF party leh Tourism department complaint-ah, an chhui chianna report Lokayukta-ah an la thehlut lo ve ve a ni.

Vanglaini palai zawhna chhangin Lokayukta hotute chuan, ACB report an nghah mek thu an sawi a, "ACB chhuina report dawng phawt ila, kalpui zel dan turah thutlukna kan siam ang. MNF leh Tourism department complaint hi hlâwm khatin kan kaltir dawn nge, a hranpain kan kaltir ang tihte pawh ACB report hmuh hma chuan sawi theih a ni lo. A ṭul dan azirin CBI chhuitir thlengin hma kan la ang," an ti.