Tuirial Jail hmun hlui cheibâwl dawn

Rajya Sabha MP K Vanlalvena chuan nimin khan Mizoram zalenna sualtu hnam sipai eng emaw zat tànna ṭhin, Tuirial Jail hmun hlui a tlawh a; Tuirial Jail hmun hlui chu humhalha cheibâwl a nih dawn thu a sawi.

MNF party thuchhuah tarlan danin, rambuai lai khan Tuirial Jail-ah Mizo hnam sipai zinga mi eng emaw zat an táng a; táng zinga mi 18 chu jail pindan chhung aṭanga lei verhin, October 16, 1979 zanlaiah an tlân chhuak a, tlân chhuak zinga pariat chu an la dam a ni.

K Vanlalvena chuan, Mizo hnam pasalṭhate tlân chhuahna hmun chu a hlu tih sawiin, "Ṭhangthar, zirlaite leh khualzinte tlawh theih turin a hmun hi MP fund aṭangin cheibawl a ni dawn a, lei verhna lai hi danglam deuh tawh mah se, lei verh kua an hnawhna laite pawh kan hai chhuak leh ang. Zalenna sualtute'n thâ leh zung nasa tak sênga an beihna hi a hlu a, ṭhangthar zawkte thinlungah ram leh hnam hmangaihna thinlung kan tuh zelna tur hmun pawimawh tak a nih ka ring," a ti.

Tuirial Jail hlui hmun hi 38 Bn BSF-te'n an luah mek a; cheibâwl a nih hmaa a hmunhma sâm faina turin Rajya Sabha MP chuan Tuirial Airfield Veng VC president Lalthangluaia hnenah pawisa a pe nghal a ni.