Health Care-a MR bill pek tur Cheng nuai 400 pe chhuak

Damlote inenkawlna senso, medical reim­bursement bill (MR bill) atan Mizoram State Health Care Society (MSHCS)-ah cheng nuai 400 pe chhuak turin chief minister Zoramthanga, Finance minister ni bawkin a hriattir nia thu dawn a ni. Hemi chungchangah hian lawmawm an tih thu Congress ṭhalaite chuan an tarlang.

Vanglaini palai zawhna chhanga MSHCS hotute sawi danin, MSHCS hnuaia MR bill pek tur sum vbc. 4 an dawn hmangin sum pek chhuah mai tura bill chinfel tawh 50 vel pek theih an inbeisei a ni.

MPYCC chuan, MSHCS hnuaia damlote MR bill cheng vbc. 71.218 awm chu July 20, 2022 hmaa pe chhuak tura Chief Minister hnena June 20, 2022-a ultimatum an thehluh hnua CM Zoramthanga'n MSHCS hnenah cheng vbc. 4 release order a pe chhuak nghal chu lawmawm an tih thu an tarlang a, "Damdawi-ina awmte bill táng a ṭhen azar pek chhuah a ni tur hi a lawmawm a, damlo leh an chhungte kan lawmpui tak zet a ni," an ti.

Cheng vbc. 4 pek chhuah ni mah se, bill táng cheng vbc. 67 chuang a la awm tih sawiin MPYCC chuan, "Damlo sing tél tak meuh bill an la bat sak dawn a, July 20, 2022 hmaa bill batte pe vek turin Mizoram sorkar kan phût nawn leh a ni," an ti a, sorkar hmalak dan an thlir zui reng dawn tih an sawi.