Kamrul-a chungchang PWD hotu zawtfiah

ZPM party hruaitu ṭhenkhat chuan ZPM Legislature Party secretary Dr Vanlalthlana leh PAC member TBC Lalvenchhunga te hoin June 20, Thawhṭanni khan PWD engineer-in-chief Bowman-a an hmu a, Kamlova Chhangte (Kamrul Islam Laskar) class-I contractor a nih theih dan an zawtfiah.

ZPM thuchhuah tarlan danin, Mizoram sorkarin contractor chung­changa notification a tih­chhuahah, Mizoram Contractor Rules, 2014 behchhanin Kamrul-a chu class-I contractor-ah dah a nih thu tarlan a ni tawh a; amaherawhchu, Rules for Enlistment of Contractors in Mizo­ram, PWD, 2014 (Enlist­ment Rules, 2014) a nih zawk avangin noti­fication siamṭhatna (corrigendum) tichuak turin ZPM hruaitute chuan PWD E-in-C an ngen a ni. Dan tlawhchhan chu a famkim tâwk lohna awm theite leh siamṭhat ngai nia langte an sawipui bawk.

March 1, 2022-a PWD E-in-C hnena KR Construction / Kamlova Chhangte hnathawh chungchang leh non-tribal a nih anga chhiah a pekna (tax deducted at source) RTI Act hmangin an zawt tawh a; chhanna an dawn tawh chin, PWD division hrang hrangte leh E-in-C office aṭanga lehkha pawimawhahte chhiah pekna (TDS) emaw, Kamlova hna­thawhna lehkha pawi­mawh (document)-ah Permanent Account Number (PAN) a thil tel loh thu larlan a ni.

"Hetianga Kamlova hnathawh tawh (work done) leh non-tribal anga chhiah (income tax) a lo pek tawhnate pawh Enlistment Rules, 2014-in a phût engmah awm loa class-I contractor nihna pek a ni hi chhui zui zel kan tum a ni," an ti.