KHAWTHLIR

Tarmit sem
Rotary Club of Aizawl chuan nimin khan zirlai naupang eng emaw zat hnenah a thlàwnin tarmit an sem. Rotary India Literacy Mission leh Vision Spring hmalaknain mit ṭha tâwk lo naupang 100 chuang hnenah a thlâwna tarmit pe turin ruahman a ni a, nimin khan Adventist Hospital-ah an sem chhuak a ni.

Vawk suat
Nimin khan veterinary officer Dr C Sanghluna hoin Thingsai khuaah vawk 100 chuang suat a ni. Thingsai khua hi African Swine Fever infected area-ah puan a ni tawh a, kumin hian ASF vangin vawk 90 chuang a thi tawh a ni.

Bazarpuiah lirthei
Traffic SP Rodingliana Chawngthu chuan, Aizawl Bazarpuiah tlai dar 6 leh zing dar 2:30 inkarah lirthei tlân luh phal a ni lo tih a tarlang a; zing dar 3-6 inkarah chawhmeh phur lirthei tlân luh phal a ni a, chawhmeh hlàn/hlànthlakin mipui leh lirthei dang chêt velna a tibuai tur a ni lo tih a tarlang bawk.

Health centre thar
Assembly deputy speaker Lalrinawma chuan nimin khan a bial chhunga Hmawngkawn khuaah Health Clinic Centre thar a hawng. Hmawngkawn Health Clinic Centre tharah hian sorkar inpeih hma chuan MLA fund aṭangin health worker rawih a ni dawn a ni.

Mi bo zawng mek
June 18, 2022 chhun aṭanga a awmna chin hriat loh PC Malsawma (44), Mission Veng, 1st MAP chu nimin khan Saipum leh a chhehvelah khawtlangin an zawng chhunzawm a, nimin tlai thleng khan hmuh a la ni lo. Mi bo zawnnaah hian Saipum khaw mi 350 vel bakah, Mission Veng aṭangin mi eng emaw zat an thawk chhuak a, YMA Mission Veng Branch chuan a ṭula hman atan Rs 22,000 bakah, buhfai, alu, dailuah, chini leh purûn eng emaw zat Saipum YMA hnenah an hlàn a ni.