NEC Secretary-in Lunglei a tlawh

North Eastern Council (NEC) secretary K Moses Chalai chuan nimin khan Lungleia NEC sum hmanga hna thawhna hmun tur a tlawh a, sorkar hotute a kâwm bawk.

Lunglei Circuit House-a sorkar official-te nen an inkawmnaah Moses Chalai chuan, economy leh ei leh barah Mizoramin kum rei lo tê chhungin hmasawnna nasa tak a hmu a, hmachhawp tam tak a la awm tih a sawi a; NEC-in Mizorama project-te a tihhlawhtlin theih nan a hmun ngeia tlawh kual a nih thu a sawi.

NEC kaltlangin hmarchhak state pariatah ṭanpuina rualkhai taka sem tum a nih thu sawiin NEC Secretary chuan, "Mizoram aṭanga project ṭha tak tak thehluh a ni ṭhin hi a lawmawm hle. Mizoram sorkar official-te NEC nena thawhhonaah an inpein an thawk ṭha tak zet," a ti.

Lunglei HPC vice chairman Lawmawma Tochhawng, MLA chuan, NEC kaltlangin Mizoramah hmasawnna ruhrel leh ei leh bar intodelhna turin hmalakna hrang hrang kalpui a ni tawh tih sawiin, "Lunglei district-ah pawh NEC kaltlangin Lunglei Super Market, digital planetarium, Backward Area Development Fund-te kalpui mek a ni," a ti a; Lunglei district atana project thehluh mek leh thehluh belh tum mekte chu pawma tihlawhtling turin NEC Secretary a ngen.

NEC Secretary hi NEC adviser (banking & industries) R Lalrodingi'n a ṭawiawm a; Lawmawma Tochhawng, Bamboo Development Board vice chairman Dr K Pachhunga, MLA, Lunglei DC leh sorkar hotute'n an lo dawngsawng a ni.