Pangzawl damdawi-in sak thar hawng

Health & Family Welfare minister Dr R Lalthangliana chuan nimin khan Pangzawl Primary Health Centre (PHC) sak thar a hawng. PHC hi NABARD sum nuai 258.94 hmanga sak a ni.

Dr R Lalthangliana chuan, Mizoramin doctor indaih lohna lian tham tak a tâwk mek tih sawiin, “Tun hnai maiah doctor ṭhahnem tak an pension bakah doctor eng emaw zat specialist zir leh mekte an awm a, sorkar doctor lak thar kan mamawh tak zet,” a ti.

Health Minister chuan, “Thingtlang leh hmun kilkhâwr zawka chengte hriselna enkawl turin kan ṭhalai rual doctor-te an rawn pên chhuah a ṭul,” a ti a; doctor zir chhuak tharte chu thingtlang lam awm inhuama pên chhuak tura a duh thu a sawi.

Pangzawl damdawi-in sak thar hawnnaah hian bialtu MLA Dr Vanlalṭanpuia, HFW principal director Dr T Lalhmangaihi, Health Services director Dr C Lalzepuii, Hospital & Medical Education director Dr KK Chhetri, Hnahthial bawrhsap R Lalremsanga leh SP Lalbiakkila Tlau leh khawtlang hruaitute an tel a ni.

Pangzawl PHC hi NABARD sum nuai 258.94 hmanga sak a ni a, khum panga ve ve awmna mipa ward leh hmeichhe ward a awm. X-ray room, laboratory room, casualty, pharmacy, OPD, operation theatre, labour room, nursing station, medical officer pisa leh changing room-te a awm bawk. Medical officer pakhat, nurse pali, health worker panga, health and wellness officer pakhat, block account manager pakhat leh 4th grade pathum an thawk mek a ni.

Nimin vek khan Health Minister hian Hnahthial Hospital-ah thisen dahṭhatna leh nausén piang hlim damlo enkawlna a hawng.

Sorkar thuchhuah tarlan danin, blood storage centre-ah hian refrigerator leh centrifuge dah a ni a; Hnahthial district-a thisen pekte dahṭhat tura Lungleia thawn ṭhin chu blood storage centre-ah dahṭhat theih a ni tawh dawn a ni. Nausen piang hlim damlo enkawlna turah radiant warmer leh phototherapy unit a awm a, centre-a thawk tur nurse tihfel tawh a ni.