MNF hi first class contractor atana vai dah hmasa ber an ni - ZPM Ṭhalai

ZPM Ṭhalai chuan thuchhuah siamin, tribal ni lote contractor an nih theihna dan siamtu Congress sorkar leh contractor atana tribal ni lo ruattu MNF sorkar thil tihte chu Mizo hnam tan a pawi dan a inchen thu leh MNF chu Mizoram sorkar awm tawh zinga first class contractor atana vai dah hmasa ber an nih thu an tarlang.

ZPM Ṭhalai tarlan danin, Mizoramah tribal ni lote contractor an nih theihna dan chu Congress sorkar lai, November 13, 2014-ah sorkar gazette-ah chhuah a ni a; chu dan tlawhchhan chuan MNF sorkar hnuaiah Kamrul Islam Laskar (Kamlova Chhangte) chu class-I contractor-ah dah a ni.

Tribal ni lote contractor an nih theihna dan siamtu Congress sorkar leh contractor atana tribal ni lo dahtu MNF sorkar thil tih chu Mizo hnam tan a pawi dan a inchen tih sawiin ZPM ṭhalaite chuan, “Ram leh hnam hmangaihnaah MNF leh Congress hian tih tak takna an neih lohzia leh an hlâwkna turah chuan mahni hnam hralh pawi an tih lohzia a lang chiang hle,” an ti a; Congress leh MNF party thil tih dan chu an dem thu an sawi.

ZPM Ṭhalai chuan, Kamrula hna chhiatzia ram pum huapa thang chhuak khawp a nih hnuah leh a hna chhiat lutuk avanga Lengpui Airport chei ṭhat mek chim chungchang Zoram mipui titi a nih mek laia class-I contractor-a dah a ni chu hriatthiam har an tih thu an sawi a, “Kamrula phênah hian hlâwkna téltu mi tu emaw tak a awm kan ring tlat. Mizo hnam party inti MNF hi Mizoram sorkar awm tawh zinga first class contractor atana vai dah hmasa bertu an ni,” an ti.