Mizoramah bank branch 234 a awm

Nimin khan Secretariat Conference Hall-ah State Level Bankers Committee (SLBC)-in review meeting an nei a, kum 2021-22 chhunga dinhmun an thlirho. Kumin March thla dinhmun angin, Mizoramah bank chi hrang 24 leh bank branch 234 a awm a, kum 2021-22 chhunga bank-te CD ratio chu 51.84% a ni tih tarlan a ni.

SLBC review meeting hi chairman Vanlalchhuanga, Finance secretary-in a kaihruai a; Vanlalchhuanga chuan, bank-te'n credit deposit ratio (CD ratio) kum kal ta aiin an nei ṭha tih sawiin, lawmawm a tih thu a sawi a, "Bank-te hi ram tihhmasawn nan an pawimawh tak zet a ni," tiin, sumdawnna loan tam zawk pe chhuak tur leh Mizoram tana hna thawk zel turin a chah.

Ṭhutkhawmah hian, financial year 2022-23 atana KVIC hnuaia PMEGP scheme atana target cheng vbc. 18.67 duan chu an pawmpui a, annual credit plan cheng vbc. 2,376.38 an pawmpui bawk.

Meeting-a tarlan danin, March 2022 dinhmun angin Mizoramah bank chi hrang 24 leh bank branch 234 a awm a; bank branch 234-te chu public sector bank branch 76, private sector bank branch 37, regional rural bank branch 99 leh cooperative bank branch 22 a ni.

Kum 2021-22 chhunga Mizorama bank-te sum hmuh (deposit) chu vbc. 14,797 a ni a, advances (loan) vbc. 7,670 awmin, CD ratio chu 51.84 % a ni.

Ṭhutkhawmah hian State Bank of India general manager Lunkim Thangboi, Reserve Bank of India general manager P Shimrah leh NABARD general manager Prasada Rao te pawh an tel a ni.

MEETING-A TARLAN ṬHENKHAT
1) Priority sector advances - Vbc. 4,484
2) Agriculture advances - Vbc. 1,635
3) MSME advances (industry & business) - Vbc. 1,570
4) FY 2021-22 March quarter chhunga Annual Credit Plan achievement 97.18%
5) FY 2021-22 March quarter chhunga priority sector achievement 66.77%