Covid-19 vanga thil tih theih mai lohah Dr Thangtea’n mipui hriatthiamna a ngen

MNF adviser leh minister Dr R Lalthangliana chuan, SEDP leh hmasawnna hrang hranga hma an lakna tur, Covid-19 avanga an tih theih nghal mai lohah mipui hriatthiamna a ngen.

Nimina Hnahthial Peniel Venga MNF pisa sak tur lungphùm a phùmnaah thu sawiin R Lalthangliana chuan, Covid-19 hripuiin budget-a awm sa ni lo sum hmanna a siam belh nasat thu a sawi a, “Hma kan la ṭan dawn chauh a, Covid vangin tum angin kan kal thei ta lo. SEDP leh development hrang hranga hma kan lak tur Covid vanga kan tih theih nghal mai lohteah mipui hriatthiamna kan ngen a, Chief Minister kaihhruaina hnuaiah hma kan la mek zel a ni,” a ti.

Dr R Lalthangliana chuan, Health minister a nih tirh phatah Health department-ah post ruak 3,000 vel a awm tih a hmu nghal nia sawiin, “CM Pu Zoramthanga, Finance minister hoin Finance, DPAR, Planing leh Health department-te chuan meeting kan nei nghal a, post ruak hnawhkhah tur 734 lak tur kan ruahman nghal a ni,” a ti bawk.