Sarâng (plastic) hman nawn loh chi hman lohna hmunah AMC pisa puang

Aizawl Municipal Corporation (AMC) mayor Lalrinenga Sailo chuan AMC pisa chu nimin aṭang khan sarâng hman nawn loh chi (single use plastic) hman tawh lohna hmunah a puang. Nimin vêk khan AMC chuan faina hnatlang an huaihawt.

AMC tarlan danin, sarâng chu mi tinin hman an mamawh ni mah se, environment tichhe thei a nih avangin sorkar laipui chuan Plastic Waste Management Rules, 2016 hmangin a khap a; chumi ang chuan AMC pawhin micron 50 aia pan sarâng khapna thupek August 1, 2019 khan a chhuah tawh a ni.

Thupek chu Plastic Waste Management (Amendment) Rules, 2021 hmangin tihdanglam hret a ni a, sarâng ip bag micron 75 aia pan hman, kawl leh zawrh khap a ni a, chumi bawhzui chuan AMC chuan December 6, 2021 khan thupek a chhuah. December 1, 2022 aṭangin micron 120 aia pan khap turin inpuahchah mek a ni bawk.

Sarâng micron 50 aia pan khapna thupek chhuah a nih hnuah AMC chuan phal chin aia pan sarâng hmang an awm leh awm loh an vâi ṭhin a; micron 50 aia pan sarâng ip kg. 5,540 chuang an man tawh. Dan zâwm lote chu a ṭul angin The Mizoram Municipalities Act, 2007 hmangin hrem ṭhin an ni.

Sarâng hman nawn loh chite chu sorkar laipui chuan July 1, 2022 aṭangin a khap tawh dawn a; chuvang chuan AMC huam chhungah pawh khap a ni ve dawn a, kawl, zuar leh hmang luite chu The Mizoram Municipalities Act, 2007 leh Plastic Waste Management By-Laws, 2019 hmanga hrem theih an ni.

JULY 1, 2022 ATANGA KHAP TURTE
1. Earbud with plastic stick (beng hawlhna)
2. Plastic sticks for balloon
3. Plastic flag
4. Candy stick
5. Ice cream stick
6. Polystyrene (thermocol) for decoration
7. Plate & tray (thlêng)
8. Cup & glass (no)
9. Spoon (thîrfian)
10. Fork (thîrkut)
11. Knive (chemtê)
12. Straw (thil inna/hîpna)
13. Wrapping/packing film around sweet box (thil fûnna)
14. Invitation card
15. Cigarette packet
16. Plastic/PVC banner (micron 100 aia pan)
17. Stirrer (thil chawhna)