Ni 9 chhung hripui vanga thi an awm lo

Mizoramah a záwnin ni kaw chhung hripui vanga thi an awm tawh lo a, June thla bikah mi pathum an thi tawh. Thi an awm hnuhnun ber ṭum chu June 12, 2022 a ni.

June 20, Thawhṭanni khan Mizoramah swab sample 203 endik zingah Covid-19 vei mi 18 hmuh chhuah a ni. Nimin khan hripui vei dam tawh mi 25 chhuahtir an ni a, hripui vanga thi an awm lo.

Thawhṭannia Covid-19 positive hmuh tharte chu mipa pasarih leh hmeichhia 11 an ni a; Rapid Antigen Test hmanga hmuh chhuah vek niin, positivity rate 8.87% a ni.

IDSP record angin, Mizoramah Covid-19 vei 2,28,751 hmuh chhuah a ni tawh a, mipa 1,06,500 leh hmeichhia 1,22,251 an ni a, mipa aiin hmeichhia 15,751-in an tam zawk. Nimin tlai dar 5 thleng khan mi 2,27,946 (99.65%) chhuahtir an ni tawh a, mi 701 (0.31%) thi tawhin, enkawl mek mi 104 (0.04%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pathum - Siaha, Lawngtlai leh Hnahthial district-te a awm a; positive active case tamna ber Aizawl district-ah mi 53 an awm mek a, Kolasib district-ah mi 21 an awm mek bawk.