Central aiawhte'n Hindi zir chiang mek ; Aizawl leh Lungleiah sikul 15 an tlawh tawh

Centrally sponsored scheme (CSS) hnuaia Mizorama Hindi zirna kalpui dan dinhmun zir chiang tura sorkar laipuiin evaluation team a rawih, Awadh Research Foundation, Lucknow, Uttar Pradesh aiawhte chuan tunlai hian Mizoram an chàmchilh mek a; nimin thleng khan Aizawl leh Lungleiah sikul 15 an enfiah tawh.

School Education department hotute hnen aṭanga thu dawn danin, Awadh Research Foundation aiawhte hi mi pahnih - Manosh Awasthi leh Anoob Kumar te an ni a, April 5, 2017 khan Aizawlah an lo thleng.

CSS Hindi zirtirtute hna thawh dan leh Mizoram sikul hrang hrangin Hindi zir an mamawh dan enfiahtu turte hian Aizawl, Lunglei, Champhai, Kolasib leh Mamit district-te an tlawh dawn a; CSS hnuaia Hindi zirtirtute thawhna sikul 130 enfiah an tum.

An enfiah zawhah sorkar laipuia Ministry of Human Resource Development-ah report an pe dawn a; an report azirin sorkar laipuiin thutlukna a siam tura ngaih a ni.

Evaluation team hian April 7 khan Aizawla high school pahnih leh middle school pahnih an tlawh a, an dinhmun an enfiah.

Tunah hian Lungleiah an chám mek a; April 10, Thawhṭanni khan Lungleiah high school pali leh middle school pathum tlawhin, an dinhmun an enfiah a; heng sikul pasariha thawk ṭhin CSS Hindi teacher-te chu sikul an tlawh laia lo awm ve turin an ngen a, mahse, Hindi zirtirtu inlan an la awm lo.

Lungleiah hian sikul 14 an tlawh dawn a, nimin khan Lungleia high school pali an tlawh leh a, ni hnih chhungin sikul 11 tlawhin, sikul dang tlawh tur pathum an la nei a, vawiinah an chhunzawm leh ang.

Evaluation team hian Lungleia CSS Hindi teacher-te chu Thawhṭanni zan khan an thlenna Circuit House-ah an kâwm a, Hindi zirtirtu 30 chuang an tel. Thawhṭanni zana kal ve lo Hindi zirtirtu dangte pawh nizan khan an kâwm leh a; MIzorama CSS Hindi teacher-te dinhmun leh harsatna te, Hindi zirna dinhmunte an sawiho a ni.

Evaluation team-in Mizorama Hindi zirna dinhmun an enfiahnaah hian CSS hnuaia Hindi zirtirtu ni ṭhinte'n an ṭawiawm ṭha hle niin School Education department hotute chuan an sawi a, lawmawm an tih thu an sawi.

Evaluation team hi School Education department aṭangin deputy director (Hindi) Lalchungnunga'n a zui a; an kalna district-a department hotute'n an lo ṭawiawm zel bawk. Lunglei district-a sikul an enfiah turte an tlawh zawhah Champhai an pan dawn a ni.