Peon leh chowkidar awm loh vangin Hnahthial HSS leh H/S sikul hawng lo

Hnahthial Higher Secondary School leh Hnahthial High School zirlai leh zirtirtute chu, sikulin peon leh chowkider an neih loh avangin nimin khan sikul leh a luhna gate hawngtu an awm lo a, sikul an kai theih loh phah.

Hnahthial aṭanga thu dawn danin, Hnahthial HSS leh H/S-ah hian chowkider pakhat leh peon pahnih an awm tur a ni a; kum 2011-ah peon pakhat a thih hnuah a hmun ruak hnawhkhah a ni lo a, hei vang hian peon pakhat leh chowkidar pakhat ve ve an awm zui a ni.

Peon pakhat dang chu kum 2014-ah pension-in a chhuak a, chowkidar pakhat pawh May 1, 2014-ah pension-in a chhuak leh bawk a; chumi hnuah tun thlengin chowkidar leh peon an nei ta lo a ni.

Peon leh chowkidar an neih loh avangin thawktute an indaih lo hle a, tualchhung mi pakhat chu hlawh tlemtê pein kumin January leh February chhung an chhawr a; mahse, sum lamah harsatna an neih avangin an ruai zui thei ta lo niin an sawi.

Peon leh chowkidar an neih loh chungchanga zawhna chhangin Hnah­thial HSS principal Tripathy chuan, January 2017 khan School Edu­cation Director-ah ziakin an thlen tih a sawi a, "Rawpui Middle School-a peon pakhat chu Board exam chhung khan rawn dah a ni a, April 7, 2017 hnuah min kîrsan leh tawh a ni," a ti.

Hnahthial HSS-ah hian pawl 12 zirlai 78 an awm a, zirtirtu History leh Education-ah pakhat ve ve an nei a, Arts subject dangah pahnih ṭheuh an awm. H/S-ah pawl 9 zirlai 90 vel leh pawl 10 zirlai 50 vel an awm mek a; headmistress nen regular teacher panga an awm a ni.