Congress hi tlak hriin a man tawh : Zoramthanga

MNF president Zoramthanga chuan nimin Siaha-ah Mara Auto­nomous District Council (MADC) inthlan awm tura MNF & MDF (Mara Democratic Front) Elec­tion Manifesto a tlangzarh. Zoram­thanga chuan, Congress party chu tlak hriin a man bet tlat tawh niin a sawi.

Coordination MNF & MDF General Conference 2017 tlang­zarhna inkhawm hi Siaha New Colony-a MTP Hall-ah neih a ni a; MNF leh MDF-te chu ṭualto party an ni tih sawiin Zorama chuan, "Congress anga Delhi châwm nun leh khawnvartui ring kan ni ve lo a, mahnia nunna nei kan ni. Kan thawhpui leh ṭhian ṭha NDA leh NEDA-te hi min pui turin lo kal se pawi chu kan ti hauh lo. Mahse, an tel lo pawhin Congress hi kan hneh tho tho dawn," a ti.

Zoramthanga chuan, National Democratic Alliance (NDA) leh North East Democratic Alliance (NEDA) hotute'n Congress chu state inthlanah 98% zelin an tla tawh a, MADC inthlanah pawh Congress chu paihthla ngei turin duhsakna an rawn thawn thu a sawi.

MNF President chuan, MNF leh MDF-te chu Congress angin inthlan dawn apiangin Delhi an pùr ṭhin ve lo tih sawiin, Congress party kungpui ber chu a zung nen van lam hawiin a tlu tawh niin a sawi a, "Vaiah kan innghat ve lo. Central leh state-ah India rama kum 50 chuang eiru chungin nuam an tâwl tawh a, lal chhungkaw rorelna hi a lo berah India ramah kum 20 chuang khenbehin a awm ve ngei dawn," a ti.

Congress party hotute'n Assembly House-ah sakhaw puithiamte nuihza siam nana hmangin an dêusawh nia sawiin Zoramthanga chuan, "Development a awm lo a, sorkar hnathawk leh mipuiin sorkar hi hnâwl hun an nghakhlel hle. Natna hrik pakhat, tlâk hriin a man tawh a, an thil tih apiang hi tlak hri a ni," a ti.

MNF leh MDF-in sorkar thianghlim an siam dawn nia sawiin, MADC chhunga mipuite chu Congress party hnawl turin a chah.

MNF party thuchhuah chuan, MNF-MDF manifesto tlangzarh­naah hian Zoramthanga'n MNF-ah voter 84 a lawm lut niin an tarlang.