Bank-te'n CSR-a an mawhphurhna An hlen chhuah ka beisei - Lalsawta

Finance minister Lalsawta chuan, Mizorama bank leh Central public undertaking dangte'n sorkar laipuiin a phût anga khawtlang tana thil ṭha ti tura an mawhphurhna, corporate social responsibilty (CSR) an hlen chhuah ngei a beisei thu a sawi.

MSU-in nimina sumdawngte tana CSR zirhona IPR directorate conference hall-a an buatsaih a hmanpuinaah Finance Minister chuan, "CSR hian sumdawngte'n dik leh rinawm taka an hmalakna kalpui a, ram sumpai dinhmun chawi kâng tura mawhphurhna an neih te, an mi chhawrte leh an chhungte khawsak mai bakah, khawtlang mipui mimir khawsak phung chawi kâng tura mawhphurhna an neihte a huam vek a ni," a ti.

Lalsawta sawi danin, Ministry of Heavy Industries and Public Enterprises hnuaia Department of Public Enterprises-in Central public sector enterprise-te tan kum kal taa chhiah an pek hnua hlâwkna an hmuh belhkhawm (profit after tax) aṭanga 1-5 % chu CSR atan an pe ngei tur a ni tiin kaihhruaina khauh tak a siam a ni.

NEDP chungchang sawiin Lalsawta chuan, "He policy thar kaltlang hian hlawhtlin tum tak takte ṭanpui an ni dawn," a ti a; financial institution-te chu NEDP-ah hmun pawimawh tak an luah dawn avangin thawhpuiah a sáwm.

Inkhawm hi MSU president RB Lalmalsawma'n a kaihruai a; Finance secretary Lalmalsawma bakah, Mizorama financial institution leh bank aiawhte an tel. Bank aiawhte chuan, CSR hmanga vantlang mipui tana hna an thawh tawh, thawh mek leh hmachhawp an neihte an sawi a ni.

CSR hi mahni sumdawnna tihlar nan emaw, event sponsor-na leh a tlukpui thil dang atana hman ai chuan a aia ṭangkai zawka hman dan kawng a awm em tih te sawiho a ni a, Start-up India Programme thiltum entrepreneurs tharte dinchhuah theihna kawng kawhhmuh leh ṭanpuite, boruak leh thil nung humhalh zawnga thawh leh ram hmasawnna tura tha an thawh theihna kawnga tha thawhte chu tihtur zinga pawimawh tak a nih thu tarlan a ni.

MSU chuan CSR sawihonaah hian Mizoram sorkarin Crop Insurance Policy a buaipui mek chu peihfel thuai an duh thu an sawi a, Mizorama chhunga nank zawng zawngten 2017-2018 chhung ngeia CSR pe ngei tura an beisei.