2015-16 chhungin Mizoramah Nausen thi 184 an awm

Nimin khan Serchhip CMO conference hall-ah nausen thihna tihtlem dan tur leh hmalak tawhnate zirhona, District Level Training on Child Death Review & Sensitization Workshop buatsaih a ni a; Mizoramah kum 2015-2016 chhungin nausen 184 an thi tih tarlan a ni.

Workshop-ah hian district immunization officer Dr Lalhunpuii'n nausen thihna chungchanga Mizoram leh an district dinhmun a sawifiah a, "Nausen thihna a thlen palhin ASHA leh health worker-te'n hapta hnih chhungin a chhan enfiahna (investigation) nei tur a ni a, an hmuh chhuahte chu District Level Child Death Committee leh State Level Task Force Committee-ah a rang thei ang bera theh luh tur a ni," a ti.

Inkhawm kaihruaitu, Serchhip CMO Dr Laldawngliana chuan, ram changkâng lo apiangah nausen thihna a thleng nasa ṭhin tih sawiin, "Ram a changkan ang zelin a tlem ve tial tial ṭhin. India ramah nausen thihna a tlem chho tial tial a, Mizoramah pawh hma kan sawn nasa hle," a ti a; Mizoram chu tuna dinhmun aia ṭhaa la ding thei a nih avangin nasa zawka beih a pawimawh thu a sawi.

Workshop-a tarlan danin, kum 2015-16 chhunga Child Death Review (CDR) report-a lan danin, India rama naupang thihna tam ber chu thla kim loa an pian vang a ni. Kum 2015-2016 chhunga Mizorama nau piang zawng zawng 20,129 (mipa 10,200 leh hmeichhia 9,745) zingah 19,945 an dam chhuak a, 184 te an thi thung.

Nausen damchhuak zo lo 184 zinga a tam ber chu thi saa piang an ni a, tam tak chu thaâkna lama harstana an neih vangte leh pneumonia natnain a man vanga thi an ni.

Workshop-ah hian Serchhip district-a medical officer, health worker leh AHSA-te bakah, Serchhip khawpui chhunga kohhran leh tlawmngai pawl hrang hrang aiawhte an tel.