MJA-te'n Khawzawl tui lakna tur an tlawh

MJA, Champhai district member-te chuan nimin khan Greater Khawzawl Water Supply Scheme siam hna Tuichang luia thawh mek a hmunah an tlawh a; hna thawktu Gangwal Engineer hotute chuan tun dinhmunah hna thawh tur zinga 90% an thawh zawh tawh thu an lo hrilh.

Champhai MJA tarlan danin, Greater Khawzawl WSS siamna atan hian cheng vbc. 24.97 ruahman a ni a, Tuichang lui tui lak tur niin, lui aṭanga meter 840-a sanga tuizem lian siamah tui lak chhoh tur a ni. March 2013-a thawh ṭan, March 2017-a zawh tura tih ni mah se, an la zo thei rih lo. A huna an zawh theih loh chhan chu sum an hmuh chak tâwk loh vang leh tui lakna hmun panna kawng ṭhat tâwk loh vang niin an sawi.

Greater Khawzawl WSS siam hna thawhna tura sum ruahman aṭangin kawlphetha lakna tur, 33 KV line siam nan cheng nuai 174 vel ruahman a ni a; Khawzawl aṭanga tui pump-na hmun km. 19-a hla chu electric hrui thlun zawh tawh a nih bakah, compact secondary sub-station bun a ni tawh.

He WSS hi kum 2011 chhiarpuia Khawzawla mihring awm zat, mi 10,400 mila siam niin, kum 30 thleng chhunga mi 36,000 tling tura chhût­in, chumi châwm zo tura ruahman a ni a; mi pakhatin ni tin tui litre 70 dawng thei tura ngaih a ni.

Hetih lai hian, Khaw­zawlah tui lak chhuah sa dah khawlna tur tui­zem siamna tur sum rua­hman a ni lo a, chuvang chuan tui litre 4,50,000 dawng tuizem awm sa leh litre 8,00,000 vel dawng tuizem thar siam tura ruahman mek a ni.