MPC-in zirlaite ngaihthahah sorkar puh

MPC party office bearer-te nimina an party pisaa ṭhukhawm chuan resolution an pass a, "Kumin academic session ṭan a nih tawh laia zirlaibu lei tur awm mumal loh vanga zirlaiten harsatna an tâwk hi pawi kan ti a, hei hian Mizoram sorkarin zirlaite a ngaihthahzia a tilang chiang hleah kan ngai," an ti.

MPC OB-te resolution hi thuchhuah siamin an tarlang a; Congress party-in mipuite world class education an tiam tih sawiin, "Tuna Mizorama sikul an enkawl dan hi em ni world class education chu, tih hi kan zawhna a ni," an ti a; a chhanna pe turin Chief Minister an phût.

Mizoram sorkar sikul zingah, thingtlang lamah zirtirtu indaih loh vanga zirlaite'n harsatna nasa tak an tawh laiin, Aizawl khawpuiah chuan zirlai tlemte awmnaah pawh zirtirtu an indaih em em nia sawiin MPC chuan, "Thing­tlang khaw ṭhenkhatah zirtirtu rawihna tura zirlai naupangte'n pawisa thawh khawm a ngaite leh Mámte khuaa zirtirtu tlem vanga sikul khâr hial ngaite hian Mizoram sorkarin zirna a kalpui fuh lohzia a tilang chiang hleah kan ngai," an ti.

MPC party chuan, Pachhunga University College-in National Assessment and Accreditation Council (NAAC) accredited grade A+ an hmuh chu ropui an tih thu an tarlang bawk.