KHAWTHLIR

Result chhuah hun tarlan a dik lo
MBSE controller of examinations Sarah Lalengzami Pachuau chuan thuchhuah siamin, social media-ah HSLC 2017 result chu April 25, 2017-a chhuak tur ang leh HSSLC result May 2, 2017-a chhuak tur anga tarlan chu thu dik lo a nih thu a tarlang a, "MBSE thuchhuak a ni lo a, he thu hian min tibuai hle. Mipuite thu dik lo hriattir chung-changah MBSE-in mawh a phur lo," a ti.

Sawmna beihpui
PRISM chuan nimin khan Champhai Vengsangah 'Sawmna beihpui' an hawng. Sawmna beihpuiah hian Champhai khawpui chhunga hmun parukah hun an hmang a, pamphlet 3,000 vel an sem chhuah bakah, Champhai district chhung khaw hrang hranga sem turin maxicab service-ah an thawn darh bawk.

Teikhang re-union
Teikhang chuan nimin khan an khaw kâwnah Teikhang re-union an hmang a, bialtu MLA H Rohluna'n a hmanpui. Teikhang re-union hi January 24, 1987-ah hman a lo ni tawh a, tun ṭum hi a vawi hnihna a ni. He hun hi Teikhang khuain kawng hrang hranga hma an sawn theih nana infuihna hun atan hman a ni.

Jubilee lawm
Zotlang Cultural Club chuan nimin khan an din champha vawi 25-na, silver jubilee an lawm a, parliamentary secretary Hmingdailova Khiangte-in hmanpuiin, jubilee lungphun a hawng. Hmingdailova chuan, Mizo hnam a boral mai lohna turin culture leh tradition vawn nun reng a pawimawh thu a sawi.

Skill development
Mizoram State Commission for Women chairperson Vanlalawmpuii Chawngthu, MLA chuan nimin khan Goodwill Foundation office, Dawrpuiah Skill Development Training in Cutting and Tailoring a hawng. Goodwill Foundation hi hmeichhiate tana puanṭhui zirna atan March 1997-ah din a ni.