SEC-in MADC inthlan hun a puang May 4, 2017-ah vote thlak a ni dawn

State election commissioner L Tochhawng chuan, nimin khan a pisaah chan­chinbu mite leh political party aiawhte hma­ah Mara Autonomous District Council (MADC) inthlan hun tur a puang. MADC inthlan hi May 4, 2017-ah neih a ni dawn a; nimin aṭang khan MADC huam chhungah model code of conduct hman nghal a ni.

MADC inthlan tur chungchanga State Election Commission (SEC)-in ruahmanna a siam dan chuan, inthlana chuh tumte tana hming pek luh hun hnuhnung chu April 19 tlai dar 3 a ni a, nomination paper-te chu April 20-ah enfiah a ni ang. Inhnûkdâwk duhte tan April 21 tlai dar 3 thleng hun hawn a ni dawn.

May 4, Ningani zing dar 7 aṭanga tlai dar 5 thleng vote thlak tur a ni a, vote thlak ṭhat ngaihna a awm chuan May 5-ah vote thlak ṭhat a ni ang.

Vote tlate chu May 8-ah chhiar a ni dawn a, inthlan kaihhnawih thilte chu May 12-ah zawh vek tur niin, MADC sorkar thar meeting hmasa ber chu May 15-ah neih tur a ni.

MADC-ah hian constituency 25 leh polling station 80 a awm a, tun ṭum inthlan turah hian voter 3,7258 an awm a, mipa 17,969 leh hmeichhia 19,289 an ni. Vote nei tamna ber bial chu Siaha East-II niin, voter 2,530 an awm a, voter tlemna ber bial Tokalo-ah voter 922 an awm.

L Tochhawng chuan, MADC inthlan turah hian venhimna uluk zualna tur bik polling station 10 a awm tih sawiin, chu'ngte chu Myanmar ramri hnaiha awm khuate an nih thu a sawi. Venhimna uluk zual ngaihna polling station-te chu - Lomasu, Bymari, Khaukhy, Chapi-I, Chapi-II, SIaisi, Pala, Amotlah, Chhaolo-I leh Chhaolo-II te a ni.

SEC chuan, MADC inthlanah hian danin a sawi angin, vote thlakna atan electronic voting machine (EVM) hman a ni dawn tih a sawi a; Election Model Code of Conduct hman nghal a ni tih sawiin, "Political party, candidate, minister, parliamentary secretary, MP, MLA leh inthlannaa inhnamhnawih public servant-te a huam ang," a ti.

Siaha DC chu district election officer leh returning officer atana ruat a ni a, assistant returning officer pahnih ruat a nih bakah, presiding officer leh polling officer turte ruat an ni dawn. Election observer atan Mizoram sorkara officer pahnih ruat a ni a, inthlan kalpui dana lungawi lohna neite'n observer-te hnenah thlen theih a ni ang.

L Tochhawng chuan, MADC-a sorkar ding mek chu an hun May 11, 2017-ah a tawp dawn tih a tarlang a; MADC inthlan chu felfai leh muanawm taka neih a nih theih nana thawhpuiah inthlanna buaipuitu te, political party te, media te, tlawmngai pawlte leh mipuite a sáwm a ni.

Nomination file hun tawp April 19, 3:00 PM
Nomination paper endik April 20
Inhnuhdawh hun tawp April 21, 3:00 PM
Vote thlak ni May 4 (7:00AM-5:00PM)
Vote chhiar ni May 8
Sorkar thar din hun May 15