Pawisa lem Rs. 24,31,000 man tawh

Mizoram police-te chuan Rs. 1,000 note leh Rs. 500 note hlui tihthih a nih hnuah pawisa lem Rs. 24,31,000 an man tawh a; April 11, 2017 pawh khan Aizawlah Rs. 2,000 leh Rs. 500 note thar lem Rs. 9,90,000 an man.

Police thuchhuahin a tarlan danin, police-te chuan Thawhlehni khan Chanmari, Aizawlah Lalrinmawii (56) w/o H Lalzuala, Mission Vengthlang hnen aṭang 2,000 leh 500 note lem Rs. 9,90,000 an man a; Lalrinmawii hi Aizawl Police Station-ah thubuai an siamsak.

Police thuchhuah tarlan danin, Rs. 2,000 note leh Rs. 500 note thar lem tun hnaiah phai aṭangin Mizoram a rawn thleng ve ṭan tih an hriat avangin theihtawpin an chhui a, tun hnaiah an man nual tawh a, chu'ngah chuan pawisa lem Rs. 24,31,000 an man tawh a ni. Pawisa lem man kaihhnawihah mi eng emaw zat an man bawk.

Police-te chuan, Rs. 2,000 leh Rs. 500 note tharah pawh a lem a chhuah leh tawh avangin mipuite chu fimkhur lehzual tura an ngen bakah, pawisa lem dawng palhte chu police-a hriattir vat turin an chah a; pawisa lem tidarhtute chu ram hmelma an nih avangin, pawisa lem chelek chíngte manna tur kawngah police-te ṭawiawm turin mipui an ngen a ni.