Aizawl ATS-in vaihlo zuarte dan an hrilhfiah

Aizawl district Anti Tobacco Squad (ATS) chuan nimin khan Aizawl New Market pisaah New Market huam chhunga vaihlo leh tuibûr zuarte ko khawmin, vaihlo leh a kaihhnawiha sumdawngte hriat turte an hrilh.

Vaihlo aṭanga siam chhuah thil zuarte chu Cigarettes and Other To­bacco Products (Pack­ag­ing and Label­ling) Amendment Rules 2014 hnuaia zawm tur hrang hrang, April 1, 2016-a hman ṭan chu hun eng emaw chen inhriat­thiamna nena kalpui a nih tawh hnuah, tun aṭang chuan khauh zawka kalpui a nih tawh tur thu an hrilh. Hei hian Aizawl district chauh ni lo, Mizoram pum a huam thu an sawi.

ATS hotute sawi danin, tualchhunga siam chhuah vaihlo leh a kaihnawih fûn­na/báwm zawng zawng­ah vaiho ṭhat lohziah tarlanna, vaukhànna thu leh a lem (pictorial health warning) târ ngei tur a ni a; pictorial health warning chuan vaihlo fûnna báwm 85% a luah tur a ni.

Dan zâwm lote chu hrem theih an nih thu ATS hotute chuan sawiin, dan bawhchhiat vawi khatnaah vaihlo siam chhuaktute chu kum hnih tàn emaw, Rs. 50,000 chawi emaw, a pahnihin emaw hrem theih a ni a; vaihlo zuar chhawngte chu vawi khat dan bawh­chhiaah kum khat tàn emaw, Rs. 1,000 chawi emaw, a pahnihin emaw hrem theih a ni thung.

Dan bawhchhiat vawi hnihnaah vaihlo siam chhuaktu chu kum nga tàn emaw, Rs. 1,00,000 chawitir emaw, a pahnihin emaw hrem theih a ni a; a zuartu chu kum hnih tàn emaw, Rs. 3,000 chawi emaw, a pahnihin emaw a hrem theih a ni.

Aizawl New Market huam chhuangah hian vaihlo zawrhna dawr 22 leh tuibûr zawrhna dawr 10 a awm mek a, New Building Block A-ah dah an ni.