MZP-in hna lakah a tling ber lak ni loin an hria

MZP chuan thuchhuah siamin, Land Revenue & Settlement department-a thawk tur LDC (muster roll) pahnih lakna kal mekah a ti ṭha ber la loin, a ti ṭha lo zawk lak tumna a awm nia an hriat thu an tarlang. IASE-a assistant professor tur lakah department pakhatah chuan a tling lo zawk lak a nia an hriat thu an sawi bawk.

MZP chuan, IASE-a assistant professor lak tharah, Methodology of Teaching of Life Science bikah a tling zawk la loin a tling lo zawk lak a awma an hriat thu an sawi a; thil dik lo a awm avangin siamṭha a, a tling leh tlak zawk la turin thuneitute an phût.

MZP tarlan danin, IASE-a Methodology of Teaching of Life Science assistant professor tur hian mi pahnihin interview an hmachhawn. He hnaah hian a subject kaihhnawih Education-ah NET neih ngei a ngai a, Methodology of Teaching of Life Science syllabus-ah science subject a awm lo. Chutih laiin, assistant professor atana lak Longjam Shambati d/o Longjam Bogenpro, Manipur chuan Education-ah NET emaw, Ph.D emaw a nei lo a; chuvang chuan Longjam Shambati chu zawm lo turin an ngen a ni.

An tarlan danin, LRS department-a thawk tur LDC pahnih lakna atan kum 2016-ah ruahmanna siam a ni a, written exam result tihchhuah a ni tawh bakah interview tih zawh a ni tawh a, appointment tihchhuah chiah hmabak a ni tawh.

MZP chuan, LDC atan hian written test-a pakhatna tling loin, pakhatna aia hniam zawkte lak tumna a awma an hriat thu an sawi a, "A thiam ber leh tling ber lak a nih theih nan hma la turin thuneitute kan phût a, sorkar hna eng pawh lak a nih dawn chuan a thiam leh tling zawkte lak a nih ngei theih nana hma la zel turin thuneitute kan ngen nghal bawk a ni," an ti.