Congress hi under-10 ah kan dah dawn - Zoramthanga

MNF president Zoramthanga chuan nimin khan Lungleia Mizo Hnam Rûnah thu a sawi a, "Kum 2018 MLA election-ah Congress hi under 10-ah kan dah ngei ngei dawn," a ti.

Zoramthanga chuan, India rama state 29 awmah Congress party-in state paliah chiah sorkarna an chang tawh tih sawiin, "Nakkum lawkah chuan India ram pumah Congress hian state pahnih khat bakah sorkarna an siam lo ang. Tuna an insawi len ve theih chhan chu Rajya Sabha-ah MP 39 an la nei a, BJP-in 36 an nei thung," a ti a; Rajya Sabha MP-te pawh thlan thar zel an nih avangin Congress-in MP an nei tlem tial tial dawn niin a sawi.

Kum 1990-1998 chhunga mipuiin ngawi renga Congress an nin lai aiin tuna an khawsak dan chu a let tam takin mipuiin an ning tawh nia sawiin Zorama chuan, "Congress hi chhetê mahin hlauhna kan nei lo. Inthlan leh hun kan nghakhlelin kan cho tawh hle. Nakkum 2018 MLA inthlanah Congress hi under 10-ah kan dah ngei ngei dawn a, under 5 pawh a ni thut thei," a ti a; mipuite chu thlamuang taka awm turin a chah.

MNF President chuan, Mizote chu tun hnaiah Mizo hnamah an harh thar nasa nia sawiin, "Kan SEDP hmang hian lei chung leh lei hnuai hausakna kan hai chhuak ang a, Lalpa'n a Chanchinṭha hril turin Mizote hi min hmang dawn a, kawng lakah min kalsan dawn lo. Mizote hi Lalpa'n Thlarau Thianghlima a kaih thawh zin ber hnam kan ni a, a rawngbawl tur hian Mizote min hman a duh a, chu mi tihlawhtling tur chuan MNF hi kan sorkar a ngai a ni," a ti.