Common Facility Centre hawn a ni
Sericulture minister Dr BD Chakma chuan Thawhlehni khan South Sabuala Lallula Hmunah Common Facility Centre a hawng.
Dr BD Chakma chuan, sericulture lam hna chu hmeichhiate chauh thawh tura ngaih a ni ṭhin chu a dik tâwk lo a, tih sawiin, "Mizoram hi sik leh sain a zir avangin muga silk (nauthak silk) thar chhuah nana ram duhawm tak a ni. Sericulture thar chhuah sum chang theite hi a hralhna lamah harsatna a awm ve lo a, a buaipui tur hian district tinah marketing counter hawn vek a ni," a ti.
Sericulture chu thar chhuah mai bakah, a siam chhuah thlenga ngaituaha buaipui thei department a nih thu sawiin Dr BD Chakma chuan, "India ram mai bakah, ram pawn thlenga thawn chhuak tura ṭan lak ni se, chumi tur chuan silk quality ṭha thar chhuak tura hmalak a ngai," a ti. South Sabualah Mizorama Common Facility Centre hmasa ber din a ni chu lawmawm a tih thu a sawi bawk.
Common Facility Centre hi North Eastern Region Textile Promotion Scheme (NERTPS) hnuaia Integrated Sericulture Development Project (ISDP) aṭanga sum hmuh nuai 35.784 sênga din a ni.