Siaha district-a Maxicab service Himna chungchang sawiho

Nimin khan Siaha DC conference room-ah Siaha District Transport Office buatsaihin, an district chhunga maxicab service-te khualzinte tan a him tâwk leh him tâwk loh zirho a ni a, Maxicab Owners’ & Drivers Association-te an tel.

He hun hi Siaha DTO MH James-in a kaihruai a; MH James chuan, lirthei chetsualna tam zawk chu khawl lam chian lohna ai mahin, driver-te fimkhur tâwk lo vang leh ruih vanga thleng a ni tih a sawi a, driver-te chu nunna hlu tak an kutah a awm a ni tih hria a, fimkhur lehzual turin a chah.

Siaha DTO hmalaknain Siaha district-a maxicab service-te mipui tana a him tâwk leh tawk loh chungchangah hian zirchianna (survey) neih a ni a; zawhna chhangtu zinga 77.2%-in a him tâwka an ngaih laiin, 22.8% chuan a him tâwk loah an ngai thung.

Hun vawn dik chungchangah, driver tam zawkte'n hun an vawng dik loah an ngai a; driver leh counter nghaktute chu an hawihhâwm tâwk thu te, maxicab driver tam zawk zûk leh hmuam leh zu-ah an fihlim tawk loh thute an tarlang bawk.