Good Friday urhsûn taka hman a ni

Nimin khan Kristiante ni pawimawh, Isua Krista khenbeh ní, Good Friday a ni a, Mizorama kohhran hrang hrangte pawhin urhsûn takin an hmang. Good Friday hma zan, Ningani khan kohhran hrang hrangte'n Isua mantira a awm ni/zan, Maundy Thursday an hmang bawk.

Roman Catholic Kohhran chuan Maundy Thursday zanah thianghlimna mass inkhawm an hmang a, puithiamte'n zirtirte ke an sil a, vênpui zan a nih angin zanlai thleng venpuina ṭawngṭaiin hun an hmang. Nimin Good Friday-ah khan parish hrang hrangte chuan an biak-in panin Kraws Kawngzawh an nei a, Lalpa Zanriah an kîl nghal. Catholic-te hian Good Friday-ah hian Isua sûn nan puitling chinin tûkṭhuan an nghei a, an ei ai leh nizana inkhawm thawhlawmte chu mi harsate ṭanpui nan an hmang dawn a ni.

Presbyterian Kohhran chuan thupuiah 'Ka pa, a theih chuan he no hian mi pel lul rawh se' tih an hmang a, Lalpa zanriah sakramen an changho a ni. Nimin Good Friday-ah khan chawhma, chawhnu leh zanah an inkhawm a, thupui hrang hrang siam a ni.

Baptist Church of Mizoram pawhin Ningani zan khan tualchhung kohhran hrang hrangah Lalpa Zanriah Sakramen an changho a; Good Friday-ah nilenga inkhawm neiin, thupui chu “Vawiinah hian ka hnenah Paradis-ah i awm ve ang,” tih a ni.

Kohhran pawl dangte pawhin Good Friday hi Ningani zan aṭangin an hmang ṭan a, nimin khan nileng leh zanah inkhawm an nei hlawm a ni.