Digi Dhan Mela hun sawn phalsak

National Institution for Transforming India (NITI) Aayog-a chief executive officer Amitabh Kant chuan, Mizoram chief secretary Lalmalsawma hnenah lehkha thawnin, Digi Dhan Mela chu April 14-ah kher buatsaih lo a, ni dang remchanga buatsaih theih a nih thu a hrilh.

Digi Dhan mela hi India ram pumah Dr Ambedkar-a pian champha, April 14-ah buatsaih tura tih a ni a; mahse, kuminah chuan Kristiante ni pawimawh, Good Friday nen a inrual avangin chief secretary Lalmalsawma chuan NITI Aayog Chief Executive Officer hnenah April 13, 2017 khan lehkha thawnin, Mizoram sorkarin April 14-ah Digi Dhan Mela a buatsaih theih loh tur thu a hriattir a ni.

Mizoram Chief Secretary lehkha hi April 13 vêk khan NITI Aayog Chief Executive Officer chuan chhangin, Digi Dhan Mela chu April 14 kher ni lo, hun remchang dangah buat­saih phal a nih thu a hriattir a; Mizoram bakah, Meghalaya leh Nagaland sorkarte pawh phalsak an nih thu an tarlang bawk.

Good Friday-a Digi Dhan Mela hman tura tihchungchangah hian Mizoram Kohhran Hruaitute Committee (MKHC) chuan, Good Friday tibuai thei zawnga sorkar laipuiin state hrang hrang a hriattir chu ṭha lo an tih thu an tarlang a; Mizorama kohhrante chu Good Friday ṭha taka hmang tur leh India ramah sakhaw zalenna a awm zel theih nan ṭawngṭai turin an ngen a ni.

Congress party pawhin thu­chhuah siamin, Good Friday-a sorkar laipui (BJP kaihhruai)-in Digital India Day (Digi Dhan Mela) hmang tura a ti chu ṭha lo an tih thu an tarlang a, "BJP sorkar hian Krismas ni tak, December 25 chu Good Governance Day atana a lo puan tawh ngaihtuahin, Kristian ni pawimawh apiang tihbawrhbân leh palzût tumin, Hindu lal ram din an tum a, India rama sakhaw zalenna nuaibo an tum nghet hleah kan ngai," an ti.